Қарздорнинг мол-мулкини хатлаш ва реализация қилиш тартибини таъминлаш масалалари муҳокама қилинди

Бош прокуратура Академияси томонидан жорий йилнинг 24 ноябрь куни Мажбурий ижро бюроси билан ўзаро ҳамкорликда Бюро фаолиятида тизимли равишда юзага келаётган камчиликлар ва муаммоларни олдини олиш ҳамда уларни бартараф этишга қаратилган видеоконференцалоқа режимида ўқув-семинари ўтказилди.

Мазкур тадбирда Бош прокуратура Академиясининг профессор-ўқитувчилари, Мажбурий ижро бюроси марказий маҳкамаси ходимлари, Бюронинг барча вилоят ҳамда туман (шаҳар) суд ҳужжатлари ва бошқа органлар ҳужжатларини ижро этиш бўлимлари инспекторлари, давлат ижрочилари, шунингдек вилоят прокуратураларининг суд ҳужжатлари ва бошқа органлар ҳужжатларини ижро этишда қонунчилик ижроси устидан назорат қилиш бўлими бошлиқлари иштирок этдилар.

Ўқув семинар давомида Вазирлар Маҳкамасининг 200-сонли қарор талабларини амалиётга тўғри татбиқ этишни таъминлаш, қарздор – юридик шахснинг мол-мулкини хатлаш ва реализация қилиш тартиби, ундирувни дебиторлик қарзига қаратиш, бир қанча ундирувчилар ўртасида ундирилган пул суммаларини тўғри тақсимлаш, шунингдек давлат фойдасига ўтказилиши лозим бўлган мол-мулкни ҳисобга олиш бўйича ишларни ташкил этиш, уларни сақлашни таъминлаш масалалари атрофлича муҳокама этилди.

Тадбир давомида бюро фаолиятининг иш самарадорлигини ошириш ҳамда илғор амалий тажрибаларни кенг жорий этиш мақсадида бюро фаолиятида тизимли равишда йўл қўйилаётган камчиликлар ва юзага келаётган муаммоларнинг таҳлили ҳамда унинг натижасидан келиб чиқиб, аниқланган ҳолатларни олдини олиш ва бартараф этиш бўйича тегишли тавсия ҳамда кўрсатмалар берилди.

Тадбир якунида ходимларга соҳага оид қонунчиликдаги ўзгаришлар ва янгиликларни мазмуни ҳақида батафсил тушунтиришлар берилиб, вилоят студияларида қатнашаётган иштирокчилар томонидан амалиётда юзага келаётган муаммолар юзасидан савол-жавоблар ўтказилди.