15 та тадбир, мингдан ортиқ иштирокчи ва хорижий экспертлар – 2026 йил 16 ноябрдан 4 декабрга қадар Ўзбекистон Республикаси Ҳуқуқни муҳофаза қилиш академияси қонунийлик ва ҳуқуқ-тартиботни таъминлашдаги замонавий чақириқлар ва янги ечимлар юзасидан халқаро мулоқот майдонига айланади.
Ўзбекистон Республикаси прокуратура органлари ташкил этилганининг 35 йиллигига бағишланган Халқаро ҳуқуқни муҳофаза қилиш форуми дастури ҳуқуқни муҳофаза қилувчи органлар, таълим ва илмий муассасалар, халқаро ташкилотлар вакилларини бирлаштиради. 40 дан ортиқ мамлакат ва халқаро ташкилот вакиллари бўлган 150 нафар етакчи хорижий экспертнинг бевосита иштирок этиши кутилмоқда.
Дастурнинг умумий мақсади – ҳуқуқни муҳофаза қилиш фаолиятининг амалий вазифаларини ҳал этиш учун тажриба, илмий билимлар ва замонавий технологияларни бирлаштириш. Эътибор марказида янги таҳдидларга қарши курашиш, жиноятларни тергов қилиш самарадорлигини ошириш, инсон ҳуқуқларини ҳимоя қилиш ҳамда жадал ўзгаришлар шароитида ишлашга қодир мутахассисларни тайёрлаш масалалари туради.
Тадбирлар ЕХҲТ, GIZ, БМТнинг Гиёҳванд моддалар ва жиноятчилик бўйича бошқармаси, Интерпол, Халқаро олимпия қўмитаси ва БМТ Тараққиёт дастури кўмагида ўтказилади.
Дастур 16 ноябрь куни Марказий Осиёда кибержиноятчиликка қарши курашиш салоҳиятини оширишга қаратилган беш кунлик халқаро тренинг билан бошланади. ЕХҲТ кўмагида ўтказиладиган тренингда Қозоғистон, Қирғизистон, Тожикистон ва Ўзбекистон ҳуқуқни муҳофаза қилувчи органларининг 23 нафар вакили иштирок этади.
Уч ҳафта давомида терроризм, коррупция, жиноий даромадларни легаллаштириш ва терроризмни молиялаштиришга қарши курашиш, наркожиноятларни тергов қилиш ва рақамли криминалистикани ривожлантириш масалаларига бағишланган халқаро ва миллий конференциялар, семинарлар ҳамда давра суҳбатлари ўтказилади. Дастурдан, шунингдек, юридик таълим ва илм-фан, ҳуқуқни муҳофаза қилиш фаолиятининг гендер жиҳатлари, ногиронлиги бўлган шахсларнинг ҳуқуқларини ҳимоя қилиш ва спортда коррупцияга қарши курашиш масалалари ҳам ўрин олган.
Марказий тадбир – 26 ноябрь куни «Қонунийлик ва ҳуқуқ-тартиботни таъминлаш: замонавий чақириқлар ва янги ечимлар» шиори остида бошланадиган Tashkent Law Enforcement Forum – 2026 халқаро илмий-амалий форуми.
Ялпи мажлис ва параллел сессияларда иштирокчилар прокуратура органлари фаолиятини такомиллаштириш, инновацион технологиялардан фойдаланган ҳолда тергов олиб боришнинг замонавий усуллари, шунингдек, коррупция ва молиявий жиноятларга қарши курашиш масалаларини муҳокама қиладилар.
Туркий давлатлар суд-ҳуқуқ таълими тармоғининг алоҳида сессияси кибержиноятчиликка қарши курашиш, рақамли далиллар алмашинуви ва рақамли криминалистика имкониятларига бағишланади.
Дастурнинг якуний қисмида рақамли криминалистика ва қонунийликни таъминлашга бағишланган миллий тадбирлар, ёш олимлар форуми, спортда ҳалолликни таъминлаш бўйича халқаро семинар ҳамда ногиронлиги бўлган шахсларнинг ҳуқуқларига бағишланган конференция ўтказилади.
Халқаро мулоқотнинг амалий давоми сифатида янги ҳамкорлик алоқалари йўлга қўйилади: форум доирасида Академия, хорижий муассасалар ва халқаро ташкилотлар ўртасида бир қатор келишув ва меморандумларни имзолаш режалаштирилган.
Уч ҳафталик дастур якунлари 4 декабрь куни бўлиб ўтадиган якуний давра суҳбатида сарҳисоб қилинади.
Форум ҳуқуқни муҳофаза қилувчи органлар, илм-фан ва таълим соҳалари ўртасидаги ҳамкорликни мустаҳкамлаш, халқаро ҳамкорликни кенгайтириш ҳамда қонунийлик ва ҳуқуқ-тартиботни таъминлаш, инсон ҳуқуқларини ҳимоя қилишда замонавий ёндашувларни жорий этишга кўмаклашишга қаратилган.
