Хитой Олий халқ прокуратураси делегацияси ташрифи

Ҳуқуқни муҳофаза қилиш академиясига Хитой Халқ Республикаси Шинжон-Уйғур автоном райони бош прокурори Гао Цзимин бошчилигидаги Олий халқ прокуратураси делегацияси вакилларининг ташрифи амалга оширилди.

Ташриф давомида делегация Aкадемиянинг фаолият йўналишлари, прокуратура ва тергов органлари ходимларини тайёрлаш, қайта тайёрлаш ва малакасини оширишни ташкил этиш тизими билан таништирилди.

Шунингдек, делегация вакиллари Академияда амалий кўникмаларни ўзлаштиришга қаратилган замонавий таълим инфратузилмаси, таълим жараёнида қўлланилаётган замонавий технологиялар ва ёндашувлар билан танишдилар. Меҳмонлар Академия юридик клиникаси, криминалистик полигонлар, рақамли криминалистика лабораторияси, суд имитацияси хонаси ва бошқа амалий ва симуляцион машғулотлар ўтказишга мўлжалланган махсус хоналар, шунингдек, ахборот-ресурс марказини кўздан кечирдилар.

Учрашув конструктив руҳда ўтди. Академиянинг таълим ва амалиётнинг ўзаро уйғунлигига асосланган ўқув фаолияти меҳмонларда катта қизиқиш уйғотди. Томонлар прокурор кадрлар салоҳиятини ошириш бўйича ўзаро манфаатли ҳамкорликни мустаҳкамлаш бўйича фикр алмашдилар.