Академияда янги электив курсга старт берилди

Ҳуқуқни муҳофаза қилиш академияси томонидан ҳуқуқни муҳофаза қилиш фаолиятининг долзарб йўналишлари бўйича малака ошириш курсларини ишлаб чиқиш, шу жумладан электрон (масофавий) форматидаги ўқув курсларни жорий этиш борасида тизимли иш олиб борилиб, бу жараёнда инновацион ёндашувлардан кенг қўлланилмоқда.

Академия мутахассислари томонидан сунъий интеллект имкониятларидан фойдаланган ҳолда ҳуқуқни муҳофаза қилиш органлари ходимлари учун «Яширин маълумотларни аниқлаш мақсадида полиграф тадқиқотларини ўтказиш» мавзусида янги электив малака ошириш курси ишлаб чиқилди.

Курс мақсади – тингловчиларда полиграфнинг ишлаш тамойиллари, унинг фаолият механизми, инсоннинг психологик ва физиологик реакциялари ҳамда тергов жараёнида полиграфдан фойдаланиш усуллари бўйича назарий билим ва амалий кўникмаларни шакллантиришдан иборат.

Курс доирасида тингловчилар жиноят ишларини тергов қилиш жараёнида полиграф тадқиқотларини ўтказишнинг замонавий усул ва муҳим жиҳатларини ўрганадилар.

Ушбу курснинг ўзига хос жиҳати – сунъий интеллект ёрдамида яратилган AI-ассистент иштирокида ўтказилишидир. Сунъий интеллект технологияларининг ўқув жараёнига интеграция қилиниши интерактив ва узлуксиз таълим учун янги имкониятларни яратади.

Бугунги кунда мазкур курсда 500 нафардан ортиқ ҳуқуқни муҳофаза қилиш органлари ходимлари таҳсил олмоқда.