Коррупцияга қарши курашувчи ҳуқуқни муҳофаза қилувчи органларнинг глобал оператив тармоғи (GLOBE) 6-ялпи йиғилиши доирасида ARIN-WCA тармоғининг консультатив йиғилиши ўтказилди

Озарбайжон Республикасининг Боку шаҳрида ўтказилган Коррупцияга қарши курашувчи ҳуқуқни муҳофаза қилувчи органларнинг глобал оператив тармоғи (GLOBE Network) 6-ялпи йиғилиши доирасида Ғарбий ва Марказий Осиё давлатларининг активларни қайтариш бўйича идоралараро тармоғи (ARIN-WCA) фаолиятини қўллаб-қувватлаш билан боғлиқ алоҳида консультатив йиғилиш ташкил қилинди.

Мазкур йиғилиш БМТнинг Гиёҳвандлик ва жиноятчилик бўйича бошқармаси (UNODC), GLOBE тармоғи, ARIN-WCA доимий котибияти – Ўзбекистон Республикаси Ҳуқуқни муҳофаза қилиш академияси томонидан ташкил қилиниб, унда ARIN-WCAга аъзо давлатлар Покистон, Тожикистон, Туркманистон, Ўзбекистон, Қозоғистон, Қирғизистон, Эрон, бундан ташқари Озарбайжон, Саудия Арабистони, UNODC, GLOBE вакиллари (30 нафарга яқин) иштирок этишди.

Тадбирда дастлаб ARIN-WCA доимий Котибияти ва аъзо давлатлар вакилларининг ҳисоботи тингланиб, ARIN-WCAга аъзо давлатлар ўртасида тармоқ самарадорлиги юзасидан ўтказилган сўровнома натижалари муҳокама қилинди.

Шунингдек, мазкур тармоқ фаолиятини келгусида янада яхшилаш, хусусан, тармоқ географиясини кенгайтириш, унга янги аъзолар ва кузатувчиларни қўшиш, ARIN-WCA веб-сайтини такомиллаштириш, 2025-2027 йиллар учун стратегик режасини қабул қилиш, аъзо давлатлар вакилларининг жиноий активларни қайтариш бўйича ҳамда янги чақириқлар бўйича билим ва салоҳиятини ошириш, тегишли давлатлар ва кейслар мисолида тренинглар, семинар ва вебинарлар ўтказиш, ташкилий ҳужжатларни такомиллаштириш, тармоқ фаолияти бўйича эксперт ишчи гуруҳларини ташкил этиш ва масъулларни белгилаш, амалий тадбирларни кўпайтириш, сўровлар натижадорлигини ошириш, хусусий сектор ва фуқаролик жамиятини кўпроқ жалб қилиш, тармоқ фаолиятини молиялаштириш, ахборот алмашиш тизимини такомиллаштириш ва бошқа тармоқлар ахборот алмашиш тизимидан фойдаланиш, EGMONT, FATF, CASC, GLOBE тармоқлари билан яқин алоқаларни йўлга қўйиш, 2025 йилда ARIN-WCA Бошқарув гуруҳи янги аъзолари ҳамда тармоқда Раислик қилувчи давлатни сайлаш каби ташкилий масалалар кўриб чиқилди.

Йиғилишда ARIN-WCA тармоғининг GLOBE тармоғига кузатувчи сифатида қўшилиш масаласини кўриб чиқиш таклифи билдирилди. Бу эса ўз навбатида ARIN-WCAнинг янги юрисдикциялар билан ҳамкорлик географиясини кенгайтириш учун хизмат қилади.

Консультатив йиғилиш самарали, ишчан ва конструктив руҳда ўтказилиб, иштирокчилар келгусида жиноий активларни қайтариш соҳасида янада фаол ҳамкорлик қилишга ҳамда ARIN-WCA тармоғини ривожлантиришга тайёр эканликларини тасдиқлашди.