Маҳаллаларда криминоген вазиятни яхшилашга қаратилган ишлар тизимли давом этмоқда

Ўзбекистон Республикаси Президентининг 2025 йил 3 январдаги “2025 йилда республика маҳаллаларида хавфсиз муҳит яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги ПҚ–1-сонли Қарори ижросини таъминлаш мақсадида Ҳуқуқни муҳофаза қилиш академияси томонидан жойларда тизимли равишда ишлар амалга оширилмоқда.

Жорий йил бошидан Академия ишчи гуруҳи томонидан Сурхондарё вилоятининг криминоген вазияти оғир бўлган маҳаллаларида кенг қамровли ўрганишлар ўтказиб келинмоқда.

Вилоят бўйича бундай тоифадаги маҳаллаларда криминоген вазиятга таъсир этувчи асл омиллар, жиноятларнинг содир этилишига имкон яратаётган сабаб ва шарт-шароитлар, шунингдек ижтимоий-маиший муаммолар ва профилактика ишларининг самарадорлиги комплекс тарзда таҳлил қилинди.

Ўтказилган ўрганишлар натижасига кўра ҳар бир ҳудуднинг ўзига хос жиҳатларини инобатга олган ҳолда илмий асосланган таклиф ва тавсиялар ишлаб чиқилиб, ҳудудий ҳуқуқни муҳофаза қилувчи органлар ва ижро ҳокимиятларига чораклик тузилаётган “Йўл хариталари”га киритиш учун тақдим этилди.

Ўрганишда ёшлар, хотин-қизлар, ишсизлар ва меҳнат мигрантлари каби ижтимоий заиф қатламлар ҳамда муқаддам судланганлар билан индивидуал тарзда ишлаш, оилавий-ижтимоий муаммолар туфайли келиб чиқиши мумкин бўлган ҳуқуқбузарликларни олдини олишга алоҳида эътибор қаратилди.

Профилактика жараёнларини рақамлаштириш доирасида бир қатор маҳаллалардаги жиноят ўчоқлари ҳисобланган ҳудудларга видеокузатув камералари, домофонлар, юз ва транспорт рақамларини таниш тизимларини ўрнатиш ва уларни ички ишлар органларининг ахборот тизимлари билан интеграция қилиш бўйича аниқ таклифлар берилди.

Шунингдек, Академия томонидан жойлардаги ўрганишлар асосида ўғрилик, фирибгарлик, тан жароҳати етказиш ва безорилик каби умумий жиноятчиликдаги ҳиссаси юқори бўлган жиноятларнинг олдини олишга қаратилган услубий қўлланмалар тайёрланиб, ҳудудий профилактика инспекторлари ва бошқа ҳуқуқни муҳофаза қилувчи орган ходимларига кундалик хизмат фаолиятида бевосита фойдаланиш учун етказилди.

Ҳозирги пайтда сариқ тоифага кирувчи маҳаллаларни ўрганиш ҳамда амалга оширилаётган профилактика чораларига илмий-услубий ёрдам кўрсатиш ишлари давом эттирилмоқда.