Академия тингловчилари учун сайёр машғулот

Ўзбекистон Республикаси Ҳуқуқни муҳофаза қилиш академиясида прокуратура органларида раҳбарлик лавозимларини эгаллаш учун заҳирада турган кадрларни касбий қайта тайёрлаш бўйича ўқув машғулотлари ўтказилмоқда. Ўқув жараёни назарий ва амалий машғулотларни самарали уйғунлаштириш асосида ташкил этилган бўлиб, сайёр машғулотларни ҳам ўз ичига олади.

Шу муносабат билан, Тошкент шаҳар ИИББ ХПБ Вояга етмаганларга ижтимоий-ҳуқуқий ёрдам кўрсатиш Марказида сайёр машғулот ўтказилди.

Машғулот давомида тингловчилар Марказнинг фаолияти, асосий вазифалари ва функциялари, шунингдек, қийин ҳаётий шароитга тушиб қолган вояга етмаганларга комплекс ёрдам кўрсатиш учун яратилган шароитлар билан танишдилар. Хусусан, идоралараро ҳамкорлик ва ўсмирлар билан индивидуал ишлаш амалиётига алоҳида эътибор қаратилди.

Қатнашчилар ўзларини қизиқтирган долзарб саволларга жавоб олдилар, вояга етмаганларнинг ҳуқуқларини ҳимоя қилиш соҳасидаги амалий масалаларни муҳокама қилдилар ва муассаса ҳудуди бўйлаб экскурсияда иштирок этдилар.

Ушбу машғулот прокуратура органлари раҳбар кадрларини тайёрлаш доирасида ўтказилаётган амалий машғулотларга йўналтирилган тадбирлар силсиласининг бир қисми бўлиб, тингловчиларнинг касбий билим ва кўникмаларини мустаҳкамлашга хизмат қилди.