«Терроризмга алоқадор жиноятларни тергов қилиш ва судловни амалга ошириш соҳасидаги илғор тажриба» мавзусига бағишланган минтақавий семинар

Ўзбекистон Республикаси Бош прокуратураси Академияси томонидан БМТнинг Марказий Осиёда гиёҳванд моддалар ва жиноятчилик бўйича ҳудудий бошқармаси ҳамкорлигида Тошкент шаҳрида  «Терроризмга алоқадор жиноятларни тергов қилиш ва судловни амалга ошириш соҳасидаги илғор тажриба» мавзусига бағишланган Марказий Осиё давлатларининг минтақавий семинари ўтказилди.

 Ушбу тадбир «Ватанларига қайтаётган халқаро террорчилар ва уларнинг оилаларини таъқиб килиш, реабилитация ва жамиятга реинтеграция қилиш соҳасида минтақавий ёндашувларни қўллаб-қувватлаш» лойиҳаси доирасида ташкиллаштирилган.

Тадбир давомида Буюк Британия, Германия, Голландия, АҚШ ва бошқа давлатларнинг малакали эксперт ва амалиётчилари терроризм, шу жумладан ватанларига қайтаётган халқаро террорчилар билан боғлиқ бўлган жиноят ишларни тергов қилиш ва судловни амалга оширишда ўзларининг илғор тажрибалари билан алмашишди.

Козоғистон, Қирғизистон, Тожикистон, Туркманистон ва Ўзбекистон давлатларининг прокуратура, суд ва адвокатлик корпуси вакиллари мазкур тоифадаги жиноят ишларини кўриб чиқишда амалиётда учрайдиган масалаларни муҳокама қилишди.

Шунингдек, мазкур соҳа бўйича ҳуқуқни муҳофаза қилувчи органлари ходимларини ўқитиш ва малакасини оширишдаги ёндашувларига алоҳида тўхталиб ўтилди.

Мазкур тадбир доирасида Бош прокуратура Академиясида БМТнинг Марказий Осиёда гиёҳванд моддалар ва жиноятчилик бўйича ҳудудий бошқармасининг жиноятчиликни олдини олиш лойиҳаси сектори менеджери доктор Артуро Лорен, Буюк Британиянинг қироллик адвокати Питер Картер ва Глазго Университетининг халқаро ҳуқуқ бўйича катта ўқитувчиси Акбар Расулов билан учрашув ўтказилди.

Экспертлар Академиянинг профессор-ўқитувчиларига БМТнинг Марказий Осиёда гиёҳванд моддалар ва жиноятчилик бўйича ҳудудий бошқармасининг «Одил судлов учун таълим» лойиҳаси доирасида терроризмга қарши курашиш ва олдини олиш соҳасида ишлаб чиқилаётган ўқитиш модулларининг тақдимотини ўтказишди.