Диққат! Ҳуқуқни муҳофаза қилиш академиясида янги магистратура йўналиши жорий этилди

Айни вақтда Ҳуқуқни муҳофаза қилиш академияси магистратурасига қабул жараёнлари давом этмоқда. Жорий ўқув йилидан Академияда янги ва долзарб магистратура йўналиши жорий этилганини маълум қиламиз.

Мамлакатимизда рақамли иқтисодиётни янада ривожлантириш, рақамли маҳсулотлар (хизматлар) истеъмолчилари ҳуқуқларини ҳимоя қилиш ва рақамли технологиялар воситасида содир этиладиган ҳуқуқбузарликларга қарши курашишни кучайтириш мақсадида Ўзбекистон Республикаси Президентининг 2025 йил 22 январдаги “Рақамли технологиялар воситасида содир этиладиган жиноятларга қарши курашиш соҳаси учун профессионал кадрлар тайёрлаш тизимини жорий этиш чора-тадбирлари тўғрисида”ги ПҚ–17-сонли Қарори қабул қилиниб, ушбу қарорга асосан Ўзбекистон Республикаси Ҳуқуқни муҳофаза қилиш академиясида 2025/2026 ўқув йилидан бошлаб ўқиш муддати бир йилни ташкил этадиган “Киберхавфсизликни ҳуқуқий таъминлаш” магистратура мутахассислиги жорий этилди.

Айнан мазкур қарор ижросидан келиб чиқиб, Ўзбекистон Республикаси Вазирлар Маҳкамасининг 2025 йил 12 июнда қабул қилинган “Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида”ги № 362-сонли қарорига асосан амалдаги Вазирлар Маҳкамасининг “Ўзбекистон Республикаси Ҳуқуқни муҳофаза қилиш академиясида олий таълим ва олий таълимдан кейинги таълимга қабул қилиш ва ўқитиш тартибини белгилаш чора-тадбирлари тўғрисида” 2023 йил 6 апрелдаги 143-сон қарорига тегишли ўзгартириш ва қўшимчалар киритилди. 

Унга кўра, “Киберхавфсизликни ҳуқуқий таъминлаш” мутахассислигига қуйидаги шахслар танлов асосида қабул қилинадилар:

– “Юриспруденция” бакалавриат таълим йўналиши бўйича таянч олий юридик маълумотга эга шахслар (кейинги ўринларда – ташқи номзодлар);

– “Юриспруденция” бакалавриат таълим йўналиши бўйича таянч олий юридик маълумотга эга прокуратура органларининг ходимлари (шу жумладан, амалдаги кадрлар захирасидаги ходимлари), шунингдек, бошқа мутахассислик йўналишлари бўйича олий маълумотга ва бевосита прокуратура органларида камида 5 йиллик меҳнат стажига эга бўлган прокуратура органлари ходимлари (кейинги ўринларда – ички номзодлар);

– ваколатли давлат органларининг “Юриспруденция” бакалавриат таълим йўналиши бўйича таянч олий юридик маълумотга эга бўлган ходимлари.

Шунингдек, мазкур мутахассислик бўйича танловда қатнашаётган номзодлар Рақамли технологиялари вазирлиги томонидан тасдиқланган нуфузли халқаро IT-сертификатга эга бўлсалар, танловнинг мутахассислик фанлари бўйича Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги томонидан ўтказиладиган «Информатика ва ахборот технологиялари» фанидан имтиҳон топширишдан озод қилинади ва уларга максимал балл берилади.

(Маълумот учун: Рақамли технологиялар вазирлиги томонидан тасдиқланган нуфузли халқаро IT-сертификатлар рўйхати Ҳуқуқни муҳофаза қилиш академияси расмий сайтида эълон қилинган).

Бундан ташқари, ушбу мутахассислик бўйича таълимнинг кундузги шаклига ўқишга қабул қилинган тингловчиларнинг охирги эгаллаб турган лавозими бўйича белгиланган тартиб ва миқдорда меҳнатга ҳақ тўлаш фонди тўловлари (пул таъминоти) сақланади.

Шунингдек, эндиликда Вазирлар Маҳкамасининг “Ўзбекистон Республикаси Ҳуқуқни муҳофаза қилиш академиясида олий таълим ва олий таълимдан кейинги таълимга қабул қилиш ва ўқитиш тартибини белгилаш чора-тадбирлари тўғрисида” 2023 йил 6 апрелдаги 143-сон қарорига киритилган охирги ўзгартириш ва қўшимчаларга мувофиқ, ваколатли давлат органларининг “Юриспруденция” бакалавриат таълим йўналиши бўйича таянч олий юридик маълумотга эга бўлган ходимлари хорижий тилни билиш даражаси бўйича тегишли миллий ёки халқаро сертификатга эга бўлмаган тақдирда, уларни чет тилидан Билим ва малакаларни баҳолаш агентлиги томонидан ўтказиладиган тест синовлари натижасига кўра ўқишга қабул қилиш бўйича тартиб белгиланди.

Шу муносабат билан 2025/2026 ўқув йилидан бошлаб белгиланган қабул параметрлари доирасида ваколатли давлат органларининг ходимлари Академия магистратурасининг “Прокурорлик фаолияти МАСОФАВИЙ” ҳамда “Киберхавфсизликни ҳуқуқий таъминлаш” мутахассисликларига ўтказиладиган танловларда иштирок этишлари мумкин.