Халқаро тренингда иштирок

Коррупцияга қарши курашиш, молиявий ҳуқуқбузарликларни аниқлаш ва олдини олиш соҳасида прокуратура органлари ходимларини сифатли тайёрлаш, қайта тайёрлаш ва малакасини ошириш мақсадида Бош прокуратура Академияси ходимлари мунтазам равишда халқаро тренингларда иштирок этиб келмоқда.

Хусусан, АҚШнинг Ўзбекистондаги элчихонаси таклифига биноан Академия, Бош прокуратура ва ИИВ ходимлари 2018 йилнинг 26-30 ноябрь кунлари Будапешт шаҳридаги (Венгрия) Халқаро ҳуқуқни муҳофаза қилувчи органлар академиясида (ILEA) “Молиявий жиноятларни тергов қилиш методлари” мавзусидаги ўқув курсида иштирок этишди.

Ўқув курсида Ўзбекистон Республикаси вакилларидан ташқари Қозоғистон, Грузия ва Словакиянинг ҳуқуқни муҳофаза қилувчи органлари ходимлари қатнашди.

Халқаро ҳуқуқни муҳофаза қилувчи органлар академияси 1995 йилда АҚШ Давлат департаменти томонидан пулни ювиш, молиявий ва бошқа жиноятларни аниқлаш ва тергов қилиш мақсадида барча давлатларнинг ҳуқуқни муҳофаза қилувчи органларини бирлаштириш  учун тузилган.

Молиявий жиноятларни тергов қилиш методикаси бўйича ташкил этилган курс молиявий фойда олиш мотиви бўлган жиноятларни аниқлаш, тергов қилиш ва фош этиш учун криминалистик бухгалтерия методидан фойдаланишга қаратилган.

Иштирокчиларга курс якунида уларни якунлаганлиги бўйича сертификатлар тақдим этилди.