Халқаро терроризмга қарши кураш бўйича прокуратура органлари ходимларининг билим ва кўникмалари оширилди.

Ўзбекистон Республикаси Ҳуқуқни муҳофаза қилиш академиясида Ўзбекистондаги Буюк Британия ва Шимолий Ирландия элчихонаси билан ҳамкорликда терроризмга қарши кураш масалаларига бағишланган махсус тренингнинг учинчи босқичи ўтказилди. Бир ҳафта давом этган тадбирда жиноят ҳуқуқи ва терроризмга қарши кураш соҳасида катта амалий тажрибага эга бўлган Британиялик эксперт, жиноят ишлари бўйича маслаҳатчи М.Кэрролл иштирок этди.

Тренингнинг мақсади – прокуратура органлари ходимларининг терроризмга қарши кураш соҳасидаги билим ва профессионал кўникмаларини ошириш, хорижий давлатларнинг ушбу соҳадаги ижобий тажрибасини, шунингдек террористик ҳаракатларни аниқлаш, тергов қилиш ва унга қарши курашиш бўйича қўлланиладиган халқаро ҳуқуқий механизмлар ва стандартларни ўрганиш ҳисобланади.

Тадбир давомида иштирокчилар очиқ манбалар разведкаси (OSINT)га кириш, Буюк Британия қонунчилигининг терроризм билан боғлиқ жиноят ишларида OSINTни қўлланиши, замонавий усуллар ёрдамида очиқ маълумотлар манбаларидан далилларни йиғиш, таҳлил қилиш ва фойдаланиш масалаларини атрофлича муҳокама қилишди.

Тадбирнинг муҳим қисми сифатида иштирокчилар томонидан амалиётдаги рақамли далиллар билан боғлиқ реал кейсларни актив муҳокама қилиш, прокуратура органлари ходимларининг терроризм билан боғлиқ жиноятларни тергов қилишда дуч келадиган мавжуд муаммоларни аниқлаш ҳамда уларни хорижий тажрибага таянган ҳолда бартараф қилиш бўйича ҳамкорликда таклифларни ишлаб чиқиш жараёни бўлди.

Тренинг иштирокчилар томонидан юқори баҳоланди, мазкур тадбирлар туркуми давом эттирилади.