Академия вакиллари Москвада бўлиб ўтган халқаро семинарда иштирок этди

Жорий йилнинг 15–17 июль кунлари Москва шаҳрида Молиявий мониторинг бўйича халқаро ўқув-услубий маркази томонидан ташкил этилган “Евроосиё гуруҳига (ЕОГ) аъзо давлатларнинг жиноий даромадларни легаллаштиришга ва терроризмни молиялаштиришга қарши курашиш (ЖДЛ/ТМҚК) миллий тизимлари учун кадрлар тайёрлашда иштирок этувчи таълим муассасаларининг салоҳиятини мустаҳкамлаш” мавзусидаги халқаро семинарда Ўзбекистон Республикаси Ҳуқуқни муҳофаза қилиш академияси вакиллари иштирок этишди.

Семинар давомида Академия вакиллари томонидан Беларусь, Қозоғистон, Қирғизистон ва Тожикистондан келган иштирокчилар билан биргаликда ЖДЛ/ТМҚК соҳасида миллий касбий стандартлар, олий таълим учун ўқув дастурлари, ўқув-услубий материаллар ва баҳолаш воситалари фондини ишлаб чиқиш ва жорий этиш, ўқув модулларини яратишнинг ҳуқуқий асослари, таълим дастурларининг мазмуни ва тузилмаси, қўшимча касбий модулларни ишлаб чиқиш, ўқитиш ва натижаларни баҳолаш технологиялари каби қатор муҳим масалалар муҳокама қилинди.

Шунингдек, иштирокчилар томонидан Молиявий мониторинг бўйича халқаро ўқув-услубий маркази (МУМЦФМ) томонидан ишлаб чиқилган “Бирламчи молиявий мониторинг субъектларининг Россия Федерацияси ЖДЛ/ТМҚК тизимидаги роли” мавзусидаги малака ошириш бўйича қўшимча таълим дастури ҳамда “ЖДЛ/ТМҚК соҳасида молиявий мониторинг бўйича мутахассис” касбий стандарти таҳлил этилди.

Мазкур семинар очиқ ва конструктив мулоқот руҳида ўтди ҳамда иштирокчиларнинг ЖДЛ/ТМҚК соҳасида мутахассисларни тайёрлаш ва қайта тайёрлаш борасидаги билим ва амалий кўникмаларини мустаҳкамлашга, шунингдек ушбу йўналишдаги халқаро ҳамкорликни ривожлантириш ва илғор тажрибаларни ўзаро алмашишга хизмат қилди.