Академия вакили одам савдосига қарши курашишга бағишланган халқаро анжуманда нутқ сўзлади

Ўзбекистон Республикаси Олий Мажлиси Сенатида Ўзбекистон Республикаси Одам савдосига қарши курашиш ва муносиб меҳнат масалалари бўйича Миллий комиссияси томонидан Миграция бўйича халқаро ташкилот / БМТнинг Миграция агентлиги ҳамкорлигида “Одам савдосига қарши курашда глобал чақириқлар: жамиятнинг роли ва халқаро ҳамкорлик” мавзусида халқаро конференция ўтказилди. Ушбу анжуман 30 июль — Бутунжаҳон одам савдосига қарши курашиш куни муносабати билан ташкил этилди.

Тадбирда давлат идоралари, фуқаролик жамияти институтлари, илмий доиралар, халқаро ташкилотлар ва дипломатик ваколатхоналардан 110 дан ортиқ мутахассис ва экспертлар иштирок этди.

Анжуманда Ўзбекистон Республикаси Ҳуқуқни муҳофаза қилиш академияси Халқаро ҳуқуқ ва инсон ҳуқуқларини ҳимоя қилиш кафедраси мудири, юридик фанлар доктори, профессор Л.Х.Исоқов “Одам савдоси ва инсон ҳуқуқлари: халқаро стандартлар ва миллий мажбуриятлар” мавзусида маъруза билан иштирок этди. У ўз чиқишида одам савдосига қарши кураш соҳасида амал қилаётган халқаро-ҳуқуқий механизмлар, инсон ҳуқуқларини таъминлашда давлатлар зиммасидаги мажбуриятлар ҳамда миллий қонунчиликдаги ислоҳотлар таҳлилига алоҳида эътибор қаратди.

Тадбирда глобаллашув шароитида одам савдоси жинояти нафақат айрим шахслар, балки бутун жамият хавфсизлиги ва барқарорлигига таҳдид солаётгани, дунё бўйича ҳар йили миллионлаб инсонлар мазкур иллат қурбонига айланаётгани ва рақамлар ошиб бораётгани алоҳида таъкидланди. Конференция доирасида “Одам савдоси: замонавий таҳдидлар ва тенденциялар”, “Одам савдосига қарши курашишда халқаро ҳамкорликнинг ўрни”, “Жабрланувчиларни ҳимоя қилишда фуқаролик жамияти институтларининг аҳамияти” каби йўналишларда сессиялар бўлиб ўтди.

Мулоқотлар чоғида рақамли муҳитда одам савдосининг янги шакллари пайдо бўлаётгани, трансчегаравий мувофиқлашувнинг аҳамияти ва нодавлат сектори иштирокининг самарадорлиги каби масалалар муҳокама қилинди. Анжуман натижасида миллий ютуқлар сарҳисоб қилинди, илғор халқаро тажриба ўрганилди ва соҳадаги устувор вазифалар белгилаб олинди.