Халқаро тадқиқот лойиҳасининг миллий тақдимоти

Ҳуқуқни муҳофаза қилиш академиясида хорижий ва миллий олий таълим муассасалари, илмий-тадқиқот ва ақлий марказлар билан қўшма консорциум доирасида амалга оширилиши режалаштирилган POLCA (Ғарбий бўлмаган жамиятларда ҳуқуқий ва бошқарув ислоҳотларининг сиёсий иқтисодиёти: Марказий Осиёдан назар) лойиҳасининг миллий тақдимоти бўлиб ўтди.

Лойиҳа Европа, Шимолий Америка ва Осиёдаги 30 дан ортиқ ҳамкор ташкилотларни бирлаштириб, фанлараро тадқиқот ва таълим дастурларини таклиф этади. Лойиҳа 2026-2029 йилларда Лунд университети (Швеция) координациясида амалга оширилади. Тадқиқот турли ҳуқуқий анъаналарнинг уйғунлигини ўзида ифодаловчи Марказий Осиё давлатларида ўтказилади.

Мазкур тадқиқот лойиҳаси Ғарб маданиятига мансуб бўлмаган мамлакатларда бошқарув ва қонун устуворлигини таъминлашга оид ижобий тажрибаларни тадқиқ этишга қаратилган. Лойиҳа Ғарб институтлари ва ҳуқуқий моделларини кўчиришга асосланган анъанавий ёндашувдан фарқли равишда, кундалик бошқарув, ҳуқуқ ва ижтимоий муносабатларни амалда белгилайдиган маҳаллий, анъанавий ва норасмий муқобил институтлар ва меъёрларни ўрганишга эътибор қаратади.

Лойиҳа универсал ғарб моделларига эмас, балки маҳаллий шарт-шароит ва қадриятларга асосланган таклифларни ишлаб чиқишни назарда тутади.