Ўзбекистон Республикаси Ҳуқуқни муҳофаза қилиш академияси ва Беларусь Республикаси Янка Купала номидаги Гродно давлат университети бакалавриат қўшма таълим дастурига қабул эълон қилинади  

Ўзбекистон Республикаси Ҳуқуқни муҳофаза қилиш академияси ва Янка Купала номидаги Гродно давлат университети (Янка Купала номидаги ГрДУ) ўртасида бакалавриат қўшма таълим дастури амалга оширилмоқда.  Янка Купала номидаги ГрДУ томонидан 6-05-0421-01 “Ҳуқуқшунослик”, Ҳуқуқни муҳофаза қилиш академияси томонидан эса “60420100 – Юриспруденция” мутахассисли ўқитилади.

Қўшма таълим дастурини амалга ошириш муддати 4 йилни ташкил қилади: дастлабки 2 ўқув йили (1-4 семестрлар) талабалар Янка Купала номидаги ГрДУда, сўнгги 2 ўқув йили (5-8 семестрлар) Ҳуқуқни муҳофаза қилиш академиясида таълим оладилар.

Қўшма таълим дастури бўйича ўқитиш рус тилида, тўлов-контракт асосида, кундузги таълим шаклида амалга оширилади.

Қабул қилиш икки босқичда амалга оширилади:

Биринчи босқичда – кириш имтиҳони оғзаки суҳбат шаклида Янка Купала номидаги ГрДУ вакиллари томонидан ўтказилади;

Иккинчи босқичда – Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги билан келишилган муддатларда рус тилидан кириш имтиҳони ўтказилади.

Бунда:

Биринчи босқичда имтиҳонларда максимал баллнинг 30 фоизидан кам бўлмаган балл тўплаган абитуриентлар иккинчи босқичда иштирок этишга ҳақли;

Иккинчи босқичда рус тилидан максимал баллнинг 30 фоизидан кам бўлмаган балл тўплаган абитуриентлар қўшма таълим дастурига қабул қилиш учун танловда иштирок этишади ва қабул параметрларига асосан ўқишга қабул қилинади.

Рус тили бўйича В1 даражасидаги миллий сертификатига эга абитуриентлар иккинчи босқичдаги имтиҳондан озод этилади ва уларга максимал балл берилади.

Номзодлар 2025 йил 3 сентябрга қадар (шу куни хам) Академиянинг https://bachelor.proacademy.uz/  электрон платформаси орқали рўйхатдан ўтишлари ва қуйидаги ҳужжатларни юклашлари лозим:

Умумий ўрта таълим (11-синф негизида) ёки ўрта махсус, касб-ҳунар профессионал таълим олганлик тўғрисидаги ҳужжат (ўқиган фанлар бўйича олган баҳо (балл)лар кўрсатилган ҳолда);

паспорт ёки ID-карта нусхаси;

ваколатли соғлиқни сақлаш муассасаси томонидан берилган ОИВ инфекцияси йўқлиги тўғрисидаги сертификат;

3 х 4 см ўлчамдаги 6 та фотосурат;

Ўзбек тилида тузилган ҳужжатларга бир вақтнинг ўзида нотариал тасдиқланган рус тилидаги таржимаси қўшиб топширилади.

Зарурият туғилганда, қўшимча ҳужжатлар ҳам талаб қилиниши мумкин.

 Қабул бўйича қўшимча маълумотни қуйидаги рақамлар орқали олиш мумкин: 71-202-04-96 (вн. 1727; 1991).