Ўзбекистон Республикаси Ҳуқуқни муҳофаза қилиш академияси магистратурасига 2025/2026 ўқув йили учун танлов жараёни якунланди

Ўзбекистон Республикаси Ҳуқуқни муҳофаза қилиш академияси магистратурасига танлов жараёни якунланди.

"Прокурорлик фаолияти", "Коррупцияга қарши курашиш", "Инсон ҳуқуқларига оид халқаро ҳуқуқ" ва "Киберхавфсизликни ҳуқуқий таъминлаш" (кундузги таълим), шунингдек "Прокурорлик фаолияти" (масофавий ва кечки таълим шакллари) йўналишлари бўйича танловда жами 862 нафар номзод иштирок этди.

Номзодлар тўплаган баллари билан паспорт (ID-карта) рақами орқали эълон қилинган рўйхатдан танишишлари мумкин.

Танлов якунларига кўра:

2025/2026 ўқув йилида Академия магистратураси тингловчилари сифатида: 65 нафар – кундузги таълимга, 38 нафар – масофавий таълимга, 11 нафар – кечки таълимга, энг юқори натижа кўрсатган номзодлар тавсия этилди.

Шунингдек, "Тергов фаолияти" мутахассислиги бўйича танловда иштирок этган 116 нафар номзоддан 33 нафари ўқишга тавсия этилди.

Кундузги таълимга тавсия этилган номзодлар жорий йилнинг 3 сентябрь куни соат 9:00 да, кечки таълимга тавсия этилган номзодлар эса шу куни соат 18:00 да Академияга қуйидаги ҳужжатлар билан ҳозир бўлишлари лозим:

1. Шахсини тасдиқловчи ҳужжатнинг асли (паспорт ёки ID-карта);

2. Олий маълумот тўғрисидаги диплом ва унинг иловасининг асли.

Масофавий таълимга тавсия этилган номзодларга Академияга келиш санаси ҳақида қўшимча равишда хабар берилади.

Академия жамоаси танловдан муваффақиятли ўтган барча номзодларни табриклайди ҳамда уларга илм-фан, таълим ва касбий фаолиятда катта муваффақиятлар тилайди!