Ахборот хизмати мутахассиси лавозимига танлов эълон қилинади

Ўзбекистон Республикаси Ҳуқуқни муҳофаза қилиш академияси Жамоатчилик билан алоқалар бўлими мутахассиси вазифасига танлов эълон қилинади (фуқаролик-ҳуқуқий шартнома муайян муддатга тузилади).

Академия ҳақида: Ўзбекистон Республикаси Президентининг 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги ПФ–257-сон Фармонига асосан Бош прокуратура Академияси негизида Ўзбекистон Республикаси Ҳуқуқни муҳофаза қилиш академияси ташкил этилди.

Тергов ҳамда ҳуқуқни муҳофаза қилиш фаолиятининг бошқа соҳаларида кадрларни тайёрлаш, қайта тайёрлаш ва уларнинг малакасини ошириш Академия фаолиятининг асосий йўналишлари этиб белгиланди, бунда Академия фаолияти очиқлиги ва шаффофлигини таъминлаш, таълим ва илмий-тадқиқот йўналишларида амалга оширилаётган жараёнларни кенг жамоатчиликка етказиш муҳим аҳамият касб этади.

Шундан келиб чиқиб, айни кунда Академия фаолиятини ОАВ да ёритиш, таълим даргоҳи имиджини шакллантириш, юртимизда олиб борилаётган кенг кўламли ислоҳотларда Академия ташаббускорлигини кўрсатиш мақсадида, Академия фаолиятига Жамоатчилик билан алоқалар бўлимига ахборот хизмати соҳасида мутахассисс жалб қилиш зарурати мавжуд. Номзод томонидан тақдим этилган ҳужжатлар маъқулланган тақдирда, у билан Академия ўртасида икки томонлама муддатли фуқаролик-ҳуқуқий шартнома имзоланади.

Мутахассис қуйидаги вазифаларни бажаради:

Академия фаолияти ҳақида ОАВ, Интернет нашрлар, Академия расмий веб-сайти ва ижтимоий тармоқлари, шунингдек, бошқа ахборот ресурслари орқали ёритиш учун ахборотларни ўзбек, рус ва инглиз тилларида тайёрлаш;

Академия фаолияти юзасидан матбуот анжуманлари, брифинглар, медиатурлар ташкил этиш;

Академия ижобий имижини шакллантириш ва илгари суриш, ижтимоий сўровлар ўтказиш ва бошқа шаклларда жамоатчилик фикрини ўрганиш;

ОАВ билан самарали ҳамкорлик қилиш, Академия билан доимий ишловчи журналистлар ва блогерлар жамоаси доирасини кенгайтириб бориш, тезкор тарқатиш учун маълумотларни тайёрлаш ва Бўлим бошлиғига тақдим қилиш;

Академия тармоқлари фаолиятини ёритиш ва улар томонидан ҳуқуқий тарғибот фаолиятини амалга ошириш мақсадида медиа-режалар ишлаб чиқиш ва улар ижросини таъминлашда иштирок этиш;

Академия раҳбариятининг мунтазам равишда ОАВда чиқишларини ташкил этишда иштирок этиш;

ахборот макони мониторингини олиб бориш ва таҳлил қилиш, танқидий ва кенг муҳокама қилинаётган материал ҳамда ахборот хуружларига тезкор муносабат билдиришда иштирок этиш;

Академия тегишли тармоқлари билан ҳамкорликда хорижий ОАВ ва ҳамкорлар сайтларида ёритиш учун маълумотларни тайёрлаш;

Академия фаолияти йўналишларини тўлақонли ёритиш имконини берадиган видеороликлар, кўрсатувлар, инфографика, буклет, брошюра ва бошқа медиа маҳсулотлари концепцияси, сценарийси ва бевосита яратилишини амалга ошириш.

Академия Жамоатчилик билан алоқалар бўлими бошлиғи топшириқларини белгиланган муддатларда ва сифатли бажариш, амлга оширган ишлари юзасидан ҳисобот бериб бориш.

Академия талабалари иштирокидаги медиатўгарак фаолиятига кўмаклашиш.

Номзодга қўйиладиган талаблар:

Мутахассисликка номзод журналистика ёки ҳуқуқшунослик соҳаларида олий маълумотга эга бўлиши.

25 ёшдан кичик, 55 ёшдан катта бўлмаслиги.

Ҳуқуқий соҳа ахборот хизматлари соҳасида 3 йилдан кам бўлмаган меҳнат стажига эга бўлиши.

Видеороликлар тайёрлаш, мақола, пост, хабар, сценарийлар ёзиш кўникмасига эга бўлиши.

Фаолият учун керакли компьютер дастурларида (Word, Power Point, Adobe Premier, Adobe Audition ва бошқалар) ишлаш кўникмасига эга бўлиши.

Прокуратура органларида мутахассис сифатида жалб қилинган ходим сифатида намунавий шахсий фазилатларга эга бўлиш.

Бажариладиган иш муддати: мазкур иш муддати 6 ойга белгиланган бўлиб, келгусида заруратга кўра, фуқаро меҳнат шартномаси асосида Академияга ишга қабул қилиниши мумкин.

Бажарилган иш учун тўлов миқдори тарафлар келишуви билан белгиланади ва талабгорга бажарилган иш натижасига кўра тўланади.

Талаблар: масъулият ва профессионализм, ташаббускорлик, жамоа билан ҳамнафас ишлаш, берилган топшириқларни ўз вақтида ва сифатли бажариш.

Иш вақти: соат 09:00 дан 18:00 гача, 40 соатлик, ҳафтасига 5 кунлик иш режимини ташкил этади.

Талабгор Академия Кадрлар бўлимига фуқаролик паспорти ёки ID картаси билан шахсан мурожаат қилиб, тегишли ҳужжатлар (шахсини тасдиқловчи ҳужжат, объективка, олий таълим олганлик (илмий даража) ҳақида диплом ва унинг иловаси, меҳнат дафтарчаси нусхаси, СТИР, ПИНФЛ маълумотномасини тақдим этиши лозим. Тақдим этилган ҳужжатлар ўрганиб чиқилганидан сўнг заруратга кўра талабгор билан комиссия таркибида суҳбат ўтказилади.

Ҳужжатларни топшириш муддати – 2025 йил 25 сентябрь (шу куни ҳам).

Манзил: Тошкент ш. Юнусобод тумани Рихсили кўчаси, 9-уй (мўлжал: эски Зенит заводи).

Душанба-жума кунлари соат 9:00 дан 17:00 гача мурожаат учун тел.: 71-202-04-96 (1737); Телеграм 99-795-01-77.