Халқаро Коррупцияга қарши курашиш Академиясида ўтказилган семинарда иштирок этилди

Бош прокуратура вакили Австрияда жойлашган Халқаро Коррупцияга қарши курашиш Академиясида ташкил этилган "Марказий Осиё ва Афғонистонда коррупцияга қарши курашишда ҳамкорликни мустаҳкамлаш" мавзусидаги халқаро семинарда иштирок этди.

Семинарда Қозоғистон, Туркманистон, Тожикистон, Қирғизистон, Ўзбекистон ва Афғонистоннинг ҳуқуқни муҳофаза қилиш органлари,  ваколатли давлат органлари ва академик доиралари иштирок этдилар.

Халқаро Коррупцияга қарши курашиш Академияси декани ҳамда ижрочи котиби Мартин Кройтнер, Академия профессори Эдуард Иванов ҳамда Иқтисодий ҳамкорлик ва тараққиёт ташкилоти эксперти Драго Кос иштирокчиларга давлатларнинг ҳуқуқий ва институционал ҳамкорлигининг муҳим масалалари тўғрисидаги тақдимотини тақдим қилдилар.

Тадбир иштирокчилари коррупциянинг олдини олиш соҳасидаги замонавий муаммолар ва тенденцияларни муҳокама қилишиб, олган билимлари ва энг илғор амалиётлар ҳақида фикр алмашдилар.

Давлатлар вакилларининг таъкидлашича, ҳудуднинг мустаҳкам келажаги ва коррупцияга қарши курашиш салоҳиятни ошириш мақсадида ишонч, халқаро ҳамкорликни кучайтириш, инновацион ғояларини амалиётга тадбиқ этиш, “коррупцияга қарши курашиш” терминологиясини “қонунга итоаткорликни ошириш” деб юритиш каби тадбирлар муҳим аҳамият касб этади.