Сирдарё вилояти прокуратурасида рақамли криминалистика бўйича семинар ўтказилди  

Ўзбекистон Республикаси Ҳуқуқни муҳофаза қилиш академиясининг Рақамли криминалистика илмий-тадқиқот институти томонидан Сирдарё вилоят прокуратурасида ихтисослаштирилган семинар-тренинг ташкил этилди.

Семинар Ўзбекистон Республикаси Президентнинг 2024 йил 21 июндаги “Рақамли криминалистика соҳасида илмий-тадқиқот фаолиятини ташкил этиш чора-тадбирлари тўғрисида”ги ПҚ-229-сон қарори ижроси доирасида ўтказилди.

Тадбирда Сирдарё вилоят прокуратура органлари терговчи ва прокурорлари иштирок этдилар. Семинар давомида рақамли далиллар билан самарали ишлашга ёрдам берувчи махсус жамланмани ишлаб чиқиш ва уни амалиётга босқичма-босқич жорий этиш масалалари атрофлича муҳокама қилинди.

Тақдим этилган махсус жамланма замонавий рақамли криминалистиканинг техник воситалари билан жиҳозланган бўлиб, ҳуқуқни муҳофаза қилувчи органлар ходимларининг жиноятларни очишдаги фаолиятини янада такомиллаштиришга хизмат қилади. Бу воситалар ёрдамида рақамли далилларни самарали тўплаш, таҳлил қилиш ва ишлаш имконияти яратилади.

Семинар иштирокчиларга рақамли далиллар билан ишлаш кўникмаларини мустаҳкамлаш ва замонавий жиноятларни тергов қилишда инновацион ёндашувларни ўзлаштириш имконини берди. Тадбир натижалари рақамли криминалистика соҳасидаги салоҳиятни ошириш ва ҳуқуқни муҳофаза қилиш органлари фаолиятига илғор усулларни жорий этишга муҳим ҳисса қўшади.