Академияда бакалавриат дастури бўйича масофавий таълим жараёни йўлга қўйилди

2025/2026 ўқув йилдан Ўзбекистон Республикаси Ҳуқуқни муҳофаза қилиш академиясида бакалавриатнинг "Прокурорлик фаолияти" таълим йўналиши бўйича масофавий таълим шаклида ўқитиш бошланди.

Ўқув жараёни бошланиши доирасида талабалар учун ўқув-танишув тадбирлари ташкил этилди. Тадбирлар давомида иштирокчиларга масофавий таълимни ташкил этиш тартиб-таомиллари, яратилган шарт-шароитлар ва дастурни самарали ўзлаштириш учун берилган имкониятлар атрофлича тушунтириб берилди.

Талабалар Академиянинг электрон таълим ресурсларидан фойдаланиш, электрон ахборот-таълим платформаси негизида дарсларни ўзлаштириш, шунингдек, ўқув топшириқларини бажариш ва назорат турларини топшириш бўйича амалий кўникмаларга эга бўлдилар.

Масофавий таълим шаклининг йўлга қўйилиши Академиянинг таълим имкониятларини кенгайтиришга қаратилган навбатдаги муҳим қадам бўлиб, замонавий рақамли технологиялардан фойдаланган ҳолда прокурорлик фаолияти соҳасида малакали мутахассисларни тайёрлашга хизмат қилади.