“Илмий тадқиқотларни ривожлантириш истиқболлари: муаммо ва ечимлар” мавзусида илмий-амалий конференцияси ўтказилди  

Ўзбекистон Республикаси Ҳуқуқни муҳофаза қилиш академиясида “Илмий тадқиқотларни ривожлантириш истиқболлари: муаммо ва ечимлар” мaвзусидaги республика илмий-aмaлий конференцияси бўлиб ўтди.

Конференциянинг мақсади – илмий тадқиқотлар соҳасидаги замонавий муаммоларни муҳокама қилиш, мавжуд мауаммоларни ҳал этиш ва унга инновацион ёндашувларни жорий этиш, халқаро ҳамкорликни мустаҳкамлаш ва илмий фаолиятнинг самарадорлигини оширишга қаратилган.

Конференцияда 30 га яқин давлат таълим ташкилотлари 100 дан зиёд ҳуқуқшунос олимлар, Финляндиянинг Тампере тажриба ва ривожлантириш Маркази директори, Финляндия таълимини экспорт қилиш соҳасида мутахассис, Академиянинг профессор-ўқитувчилари, Бош прокуратура, Давлат сиёсати ва бошқаруви академияси, Олий таълим, фан ва инновациялар вазирлиги ва вазирлик ҳузуридаги ОАК, Инновацион ривожланиш агентлиги, Парламент тадқиқотлари институти, Қонунчилик ва ҳуқуқий сиёсат институти, Одил судлов академияси, Инсон ҳуқуқлари бўйича Ўзбекистон Республикаси Миллий маркази, олий юридик таълим муассасалари вакиллари, мустақил изланувчилар, таянч докторантлар, магистратура тингловчилари иштирок этишди.

Конференцияда илмий соҳада юридик фанлар ихтисослиги бўйича кадрлар тайёрлаш сифатини оширишнинг долзарб масалалари, ҳуқуқий фан ва илмий тадқиқотларда рақамли инқилоб, сунъий интеллект асосида яратилган контентларнинг истиқболлари, илмий даражали кадрлар тайёрлаш соҳасидаги ислоҳотлар ва келгусидаги режалар, курсантларни илмий тадқиқот фаолияти билан шуғулланиш муаммолари ва истиқболлари, илмий-тадқиқот жараёнида ёш тадқиқотчилар салоҳияти: муаммо ва ечимлар, ижтимоий хавф гуруҳига кирувчи ёшлар муаммоларини ҳал қилишда юридик клиниканинг аҳамияти, илмий тадқиқотларни ўтказишда мавжуд муаммолар ҳақида баъзи мулоҳазалар каби йўналишлар бўйича илмий маърузаларга кенг эътибор қаратилди.

Конференция ҳуқуқни муҳофаза қилиш соҳасида илмий тадқиқотларнинг мавжуд ҳолатини баҳолаш ҳамда бу йўналишдаги келгуси ривожланиш стратегияларини шакллантиришда муҳим платформа вазифасини ўтади. Шу билан бирга, соҳанинг илмий ва таълимий жиҳатларини таҳлил қилиш орқали унинг истиқболдаги устувор йўналишларини белгилаш тадбир ишини жонли руҳда ўтишига хизмат қилди.

Илмий-амалий конференцияси якунида иштирокчилар томонидан келгусида илмий тадқиқотларнинг хусусан, юридик соҳадаги барча тармоқларини ривожлантиришда ҳамда ҳуқуқни қўллаш амалиётидаги масалалар бўйича ўзаро манфаатли ҳамкорликни амалга ошириш, илмий-амалий тажриба алмашишга келишиб олинди.

Иштирокчилар конференция натижаси бўйича чоп этиладиган материаллар тўпламига ўз илмий мақола ва тезисларини тақдим этишлари мумкин.