Ҳуқуқни муҳофаза қилиш академиясида китоб ярмаркаси бўлиб ўтди

Ўзбекистон Республикаси Ҳуқуқни муҳофаза қилиш академиясида талабалар ва тингловчиларнинг бадиий ҳамда илмий адабиётга қизиқишини оширишга қаратилган тизимли чора-тадбирлар амалга оширилмоқда. Бу жараён уларнинг дунёқарашини кенгайтириш, танқидий фикрлаш қобилиятини шакллантириш ҳамда таълим дастурларини муваффақиятли ўзлаштиришга хизмат қилади.

Академияда навбатдаги китоб ярмаркаси ташкил этилди. Тадбирда Академия ходимлари, профессор-ўқитувчилар, докторант ҳамда талабалари иштирок этдилар.

Ярмарка иштирокчилари юридик адабиётлар, дарсликлар, кодекслар билан бир қаторда бадиий адабиётларни ҳам харид қилиш имкониятига эга бўлдилар. Иштирокчиларда жумладан тарихий, детектив ва психологик асарлар катта қизиқиш уйғотди.

Бундай тадбирлар ёшларнинг сифатли адабиётлардан баҳраманд бўлишини кенгайтириш, шунингдек, бўлажак ҳуқуқшуносларда мунтазам китоб мутолаа қилиш одатини шакллантиришга хизмат қилиб, уларнинг шахсий ва касбий ривожланишида муҳим омил ҳисобланади.