БМТ Гиёҳвандлик ва жиноятчилик бўйича бошқармаси ҳамда ARIN-WCA тармоғи ҳамкорлигидаги вебинарлар туркумининг 4-қисми ташкил этилди

БМТнинг Гиёҳвандлик ва жиноятчилик бўйича бошқармаси (БМТ ГЖБ) Минтақавий ваколатхонаси ҳамда Ғарбий ва Марказий Осиё давлатларининг Активларни қайтариш бўйича идоралараро тармоғи (ARIN-WCA) Котибияти ҳамкорлигида ташкил этилган туркум вебинарлар давом этмоқда, навбатдаги вебинар “Жиноий активларни қайтаришда вақтинча чеклов, мусодара ва олиб қўйиш чоралари” мавзусида ўтказилди.

Вебинарда ARIN-WCA тармоғи Котибияти (Академия), Бош прокуратура, Адлия вазирлиги, Истиқболли лойиҳалар миллий агентлиги, Божхона қўмитаси ва Солиқ қўмитаси вакиллари иштирок этди.

Навбатдаги вебинарда экспертлар сифатида Гонконг Мустақил коррупцияга қарши комиссияси (ICAC)нинг Активларни қайтариш бўлими раҳбари Судхир Гидвани ва Гонконг Сертификатланган бухгалтерлар институти аъзоси Калвин Ю Хо Мин чиқиш қилишди.

Иштирокчилар активларни вақтинча чеклаш ва мусодара қилиш жараёнида учрайдиган ҳуқуқий муаммолар, процессуал чоралар қўллашда учинчи шахсларнинг қонуний ҳуқуқ ва манфаатларини таъминлаш, активлар мусодараси бўйича амалий тажрибалар билан танишдилар.