"Китобхон ёшлар лигаси" онлайн китобхонлик танловида иштирок ва ғалаба

Ўзбекистон Республикаси Олий таълим, фан ва инновациялар вазирлиги ташаббуси билан мамлакат олий таълим муассасалари талабалари ўртасида ташкил этилган “Китобхон ёшлар лигаси” онлайн китобхонлик республика танлови муваффақиятли якунланди.

Танловдан кўзланган асосий мақсад – талабалар ўртасида китоб ўқиш маданиятини кенг тарғиб этиш, маънавий ва интеллектуал ривожланишни қўллаб-қувватлаш, ёшларнинг таҳлилий фикрлаш қобилиятини оширишдан иборат бўлди.

Танлов бир нечта босқичда ўтказилиб, унда мамлакат бўйлаб турли йўналишларда таҳсил олаётган минглаб талабалар фаол иштирок этдилар. Иштирокчилар белгиланган бадиий ва илмий-оммабоп асарларни ўқиб, онлайн платформа орқали тест саволларига жавоб бердилар, таҳлилий иншо ва тақдимотлар тайёрладилар.

Мазкур танловда Ўзбекистон Республикаси Ҳуқуқни муҳофаза қилиш академияси магистратураси тингловчилари ҳам иштирок этиб, юқори савиядаги билим ва таҳлилий қобилиятини намоён этган ҳолда, фахрли ўринга сазовор бўлди ва диплом, эсдалик совғалари ва китоблар билан тақдирландилар.