Академия талабалари – халқаро олимпиада ғолиблари

Красноярск шаҳрида (Россия Федерацияси) Молиявий хавфсизлик бўйича V-халқаро олимпиада бўлиб ўтди.

Олимпиаданинг финал босқичи 4 та йўналиш: иқтисодий хавфсизлик, ахборот хавфсизлиги, юриспруденция ва халқаро муносабатлар бўйича ўтказилиб, унда 40 давлатдан 600 нафар талаба қатнашди.

Олимпиаданинг финал босқичида Ҳуқуқни муҳофаза қилиш академияси, Тошкент давлат юридик университети, Тошкент давлат иқтисодиёт университети ва Тошкент шаҳридаги Инха университетининг 10 нафар талабаларидан иборат Ўзбекистон жамоаси иштирок этди.

Ўзбекистон жамоасининг олимпиадага тайёргарлиги Ўзбекистон Республикаси Ҳуқуқни муҳофаза қилиш академияси базасида ўтказилди.

Талабаларимиз юқори тайёргарлик даражасини намойиш этиб, мамлакатни халқаро майдонда муносиб тақдим этдилар: 5 нафар талаба олимпиада номинацияларида ғолиб ва совриндорликни қўлга киритиб, қимматбаҳо совғалар билан тақдирланди, улардан 1 нафари I даражали ва 4 нафари II даражали дипломларни қўлга киритди.

Мазкур Олимпиадада иштирокчилар учун 100 дан ортиқ таълим, спорт ва маданий тадбирлар, хусусан, 30 та практикум, 40 га яқин мастер-класс, тренинг ва муҳокамалар ташкил этилиб, ушбу жараёнга 500 нафарга яқин экспертлар жалб этилди.

Олимпиада натижасига кўра, Ўзбекистон вакиллари 40 давлат ичида фахрли 3-ўринни эгаллашди.