Жиноятчиликни олдини олишнинг замонавий усуллари бўйича тренинг

Ўзбекистон Республикаси Бош прокуратураси Академиясида Тошкент шахар ИИББнинг раҳбар кадрлари, Шайхонтоҳур тумани жиноятчилик содир этилиши сабабларини тизимли таҳлил қилиш эксперт-таҳлил гуруҳи ва Бош прокуратураси ҳодимлари учун жиноятчиликнинг олдини олишнинг замонавий усуллари бўйича тренинг машғулоти ўтказилди.

Тренинг Академия томонидан БМТнинг Тараққиёт дастури “Қонун ижодкорлигини модернизациялашга ёрдам бериш ва СОВАЗ/ Фаза-2” ҳамда Буюк Британиянинг Ўзбекистондаги элчихонаси ҳамкорлигида ўтказилди.

Тадбир Академиянинг жиноятларни содир этилиши сабабларини тизимли таҳлил қилиш ва ўрганиш Маркази олдига қўйилган вазифалар ва ҳуқуқни муҳофаза қилиш тизимининг ўзига хос хусусиятларини ҳисобга олган ҳолда жиноятчиликни эрта олдини олишда илғор хориж тажрибасини ўрганиш ва уни Ўзбекистонда қўллаш имкониятларини муҳокама қилиш мақсадида ўтказилди.

Тренинг Парагвай, Чили, Канада, Буюк Британия ва бошқа мамлакатлардаги ҳуқуқни муҳофаза қилиш органлари фаолияти самарадорлиги таҳлилларини ўтказган Лунд университетининг (Швеция) ҳуқуқшунослик ва криминология фанлари профессори П.Олссон томонидан олиб борилди.

Шайхонтоҳур туман ҳуқуқни муҳофаза қилувчи идораларининг ҳуқуқбузарликлар профилактикаси фаолиятидаги самарадорлигини таҳлил қилишда кўмаклашган чет эл эксперти П.Олссон, тренинг давомида Ўзбекистонда жамоатчилик хавфсизлиги масалаларини ҳал қилишда замонавий инновацион ёндашувларни ифодаловчи бир қатор фикрлар билдирилди.

Ўтказилган тренинг иштирокчилар томонидан ижобий баҳоланди. Олинган билимлар келгусида Ўзбекистонда жиноятчиликнинг олдини олиш механизмларини такомиллаштириш бўйича чора-тадбирлар дастурини ишлаб чиқишда қўлланилади.