Ўзбекистон ёзувчилар уюшмаси вакилларининг Ҳуқуқни муҳофаза қилиш академиясига ташрифи

Ўзбекистон Республикаси Ҳуқуқни муҳофаза қилиш академиясида прокуратура органлари ходимлари ўртасида ўтказилаётган "Тил яшаса, миллат яшайди" республика танлови доирасида Ўзбекистон ёзувчилар уюшмаси аъзолари билан учрашув бўлиб ўтди.

Ташриф давомида шоирлар Салим Ашур ва Сирожиддин Рауф, шунингдек, уюшманинг бошқа вакиллари Академия кутубхонаси фаолияти билан яқиндан танишиб, профессор-ўқитувчилар ва тингловчилар учун яратилган замонавий шарт-шароитларни кўздан кечирдилар.

Ёзувчилар уюшмаси номидан Академия кутубхонасига 50 номдаги бадиий адабиётлар тақдим этилди. Улар орасида ўзбек ва жаҳон классиклари асарлари, замонавий бадиий, фалсафий ва илмий адабиётлар, шунингдек, жаҳон адабиёти намуналари ўрин олган.

Академия раҳбарияти Ўзбекистон ёзувчилар уюшмасига маънавий-маърифий ҳамкорликка қўшган ҳиссаси учун миннатдорлик изҳор этиб, келгусида адабий ва маданий алоқаларни янада ривожлантиришга тайёрлигини билдирди.

Мазкур ташаббус Академияда маънавий муҳитни янада бойитиш, ходимлар ва тингловчиларнинг интеллектуал ҳамда ахлоқий салоҳиятини юксалтириш, шунингдек, она тили ва миллий қадриятларга ҳурмат руҳини мустаҳкамлашга хизмат қилади.