“Илмли аёл – бутун жамиятни тарбиялайдиган энг улуғ кучдир” мавзусидаги тадбир бўлиб ўтди

Ўзбекистон Республикаси Ҳуқуқни муҳофаза қилиш академиясида талаба-қизлар учун “Илмли аёл – бутун жамиятни тарбиялайдиган энг улуғ кучдир” мавзусида маънавий-маърифий тадбир ташкил этилди. Тадбирнинг асосий мақсади билимли ва фаол аёлнинг жамият тараққиётидаги ўрни ва аҳамиятини ёритиш, шу орқали уларни ўз устида доимий ишлашга, интеллектуал ва маънавий ривожланишга чорлашдан иборат бўлди.

Тадбирда Академия профессор-ўқитувчилари, тьюторлар ҳамда талаба-қизлар иштирок этдилар. Шунингдек, тадбирга Юнусобод тумани Ҳокимияти Хотин-қизлар бўлими бош мутахассиси Г.Каршиева эксперт сифатида таклиф этилди.

Суҳбат жараёнида билимли, ташаббускор ва ватанпарвар аёллар образи, уларнинг оила ва жамиятдаги масъулиятли роли ҳақида фикрлар билдирилди. Г.Каршиева ўз чиқишида замонавий аёлнинг жамиятдаги фаол иштироки, ёш авлодни маънавий баркамол қилиб тарбиялашдаги аҳамияти ҳақида фикр билдирди. Шунингдек, талабаларнинг шахсий ривожланиши, таълимда ва жамоат фаолиятидаги ютуқлари ҳам алоҳида эътироф этилди.

Тадбир самимий ва илҳомбахш руҳда ўтди. Ўтказилган тадбир талаба-қизларнинг маънавий дунёқарашини кенгайтириш, уларда Ватанга садоқат, билимга интилиш ва масъулият туйғусини кучайтиришга хизмат қилди.