Академия Times Higher Education World University Rankings 2026 халқаро рейтингида эътироф этилди

Академия нуфузли халқаро Times Higher Education World University Rankings 2026 рейтингига Reporter мақоми  билан эътироф этилди. Бу ютуқ Академиянинг барқарор ривожланиши ҳамда юридик ва ҳуқуқни муҳофаза қилиш соҳасидаги халқаро нуфузининг ортиб бораётганини кўрсатади.

Бундай эътироф Академиянинг таълим сифати бўйича юқори халқаро стандартларни жорий этиш ва қўллаб-қувватлашга қаратилган тизимли саъй-ҳаракатлари самарасидир. Академия жаҳон илмий ҳамжамиятида фаол иштирок этиб, очиқлик, илмий алмашинув ва касбий юксалиш тамойилларига содиқлигини намоён этмоқда.

2026 йилги рейтингда 115 та давлатдан 2 200 га яқин олий таълим муассасалари қайд этилган бўлиб, бу ўтган йилга нисбатан 5 % кўпдир. Рейтингнинг юқори поғоналарида анъанавий равишда Оксфорд университети, Массачусетс технология институти, Принстон, Кембриж ва Гарвард университетлари (Буюк Британия ва АҚШ) жой олган.

Айни пайтда, сўнгги беш йил ичида рейтингда Осиё мамлакатлари университетларининг иштироки сезиларли даражада ошиб, рейтинга янги қўшилган университетларнинг 60 фоизи ушбу минтақага тааллуқли. Бу минтақанинг илмий ва таълим салоҳиятининг жадал ўсиши ҳамда жаҳон академик маконидаги нуфузининг ортаётганидан далолат беради.