“Тил яшаса, миллат яшайди!” мавзусида республика танлови бўлиб ўтди

2025 йилнинг сентябрь-октябрь ойларида Ўзбекистон Республикаси прокуратура органлари ходимлари ўртасида “Тил яшаса, миллат яшайди!” мавзусида республика танлови ўтказилди.

Танлов икки босқичдан иборат бўлиб, унда дастлаб ҳудудий босқичда “Тизимли таҳлилий иш”, “Саводхонлик” ҳамда “Шеърият” йўналишлари бўйича  ғолиб бўлган 100 нафардан ортиқ иштирокчи якуний республика босқичида беллашдилар.

Танловнинг барча босқичларида иштирокчилар таниқли ёзувчи ва шоирлар, филологлар, адабиётшунослар ва бошқа мутахассислардан иборат ҳакамлар ҳайати томонидан баҳоландилар.

Танловнинг “Тизимли-таҳлилий иш” йўналиши бўйича дастлабки босқичда ғолиб деб топилган иштирокчилар якуний босқичда таҳлилий ишни ёзишда давлат тили тўғрисидаги қонун ҳужжатларига риоя етилиши ҳолати ва ушбу соҳада жамоатчилик назоратининг самарали усуллари, давлат тилининг амал қилиши билан боғлиқ муаммоларни бартараф этиш йўллари ва чоралари, давлат тилининг нуфузи ва обрўсини янада ошириш бўйича таклиф ва мулоҳазалар билдиришди. Мазкур йўналиш бўйича совринли ўринлар билан бир қаторда “Анъанавий вазият ва ноанъанавий ечим” номинацияси ғолиби ҳам аниқланди.

“Саводхонлик” йўналишининг дастлабки босқичида номзодлар ўзбек адабий тили меъёрлари ва лотин ёзувига асосланган ўзбек алифбоси доирасида тест саволларини ечишлари, якуний босқичда эса ёзма иш (диктант) ёзишлари белгиланган бўлиб,  “Энг чиройли ҳуснихат” номинацияси соҳиби аниқланди.

“Шеърият” йўналиши бўйича танловнинг дастлабки босқичида номзодлар “Ватан”, “Ўзбек тили”, “Касб” каби мавзуларда ўзлари танлаган шеърий матнни ёки муаллифлигидаги шеърни ифодали айтиб бердилар. Якуний босқичда эса иштирокчилар юқоридаги мавзулар доирасида Ҳайъат томонидан олдиндан тақдим этилган шеърий матнни ифодали ўқиб, унинг мазмунини таҳлил қилиб беришлари лозим эди. “Шеърият” йўналишида 1, 2 ва 3-ўрин ғолиблари билан бир қаторда “Энг жозибали шеърий ифода” номинацияси соҳиби аниқланди.

Якуний босқич натижаларига кўра, барча йўналишлар бўйича ғолиблар ва номинация соҳиби бўлган ходимлар дипломлар, совға ва бошқа рағбатлантириш турлари билан тақдирланадилар.