UNODC ҳамда ARIN-WCA тармоғи ҳамкорлигидаги вебинарлар туркумининг 5-қисми ташкил этилди

БМТнинг Гиёҳвандлик ва жиноятчилик бўйича бошқармаси (UNODC) Минтақавий ваколатхонаси ҳамда Ғарбий ва Марказий Осиё давлатларининг Активларни қайтариш бўйича идоралараро тармоғи (ARIN-WCA) Котибияти ҳамкорлигида ташкил этилган туркум вебинарларнинг навбатдаги қисми “Жиноятчилар маблағларни легаллаштиришини кутманг! Давлат-хусусий шериклиги: виртуал активларни кузатиш, ҳамкорликда тергов ўтказиш ва активларни қайтариш” мавзусидаги ўқув машғулотлари ўтказилди.

Тадбирда ARIN-WCA тармоғи Котибияти (Академия), Тожикистон, Туркманистон, Қозоғистон, Қирғизистон, Эрон, Покистон давлатларининг ваколатли органлари, шунингдек Ўзбекистон Республикаси Бош прокуратураси, Иқтисодий жиноятларга қарши курашиш департаменти, Адлия вазирлиги, Солиқ ва Божхона қўмиталари, Истиқболли лойиҳалар миллий агентлиги масъул ходимлари иштирок этди.

Вебинарни UNODC Минтақавий ваколатхонаси маслаҳатчиси А.Водяной олиб борди. Экспертлар сифатида Қозоғистон Республикаси Бош прокуратураси Активларни қайтариш қўмитаси прокурори Сабит Аманқоссов, Остона шаҳридаги инвестиция, криптоактивлар ва банк хизматларини ривожлантириш фаолият кўрсатувчи “Tarlan Development Group” Ltd. компанияси раҳбари Темирлан Нурахимов ҳамда пул ювишга қарши курашиш ва виртуал активлар бўйича халқаро эксперт Олексей Фешченко чиқиш қилишди.

Иштирокчилар прокуратура, ҳуқуқни муҳофаза қилиш органлари, молиявий разведка бўлинмалари, назорат органлари ва хусусий сектор ўртасидаги активларни қайтаришда амалий ҳамкорлик ҳамда қўшма тергов ҳаракатлари ўтказиш, шубҳали операциялар ҳақидаги хабарларни юбориш ва ахборот алмашиш платформалари ҳақида бўйича амалий тажрибалар билан танишдилар.