Коррупцияга қарши курашиш бўйича Республика идоралараро комиссиясининг медиа-марафони

2018 йилнинг 10-14 декабрь кунлари Халқаро коррупцияга қарши курашиш куни нишонланиши муносабати билан БМТнинг Ўзбекистондаги лойиҳалар координатори ва БМТнинг Гиёвҳанд моддалар ва жиноятчилик бошқармаси иштирокида Коррупцияга қарши курашиш бўйича Республика идоралараро комиссиясининг бир ҳафталик медиа-марафони ўтказилди.

Ҳафталик Тошкентдаги Ёшлар ижодиёт саройида Ўзбекистоннинг барча ҳудудларидан олий таълим муассасалари ва касб-ҳунар коллежлари студентлари томонидан тайёрланган расмлар, плакатлар ва иншоларнинг кўргазмаси билан бошланди. Кўргазмада 300 дан ортиқ санъат наъмуналари намойиш этилди. Кўргазмадаги ишлар ёшларнинг коррупция муаммосини қандай қабул қилишларини кўрсатиб берди.

Ҳафталик медиа-марафон доирасида ташкиллаштирилган “Одамлар ўртасида коррупцияга нисбатан муросасизликни тарғиб қилинишида ОАВнинг роли” семинарида 60 дан ортиқ журналист иштирок этди. Тадбир жараёнида иштирокчилар ОАВнинг коррупция феноменига муросасизликни тарғиб қилиш орқали уни профилактика қилиш стратегиясидаги ролини муҳокама қилишди.

Марафоннинг асосий воқеаси бўлмиш “Ўзбекистоннинг антикоррупцион ислоҳотлари – 2018: натижалар ва устунликлар” мавзусидаги халқаро конференцияда 100 дан ортиқ вазирлик ва идоралар, шунингдек халқаро ташкилотларнинг вакиллари иштирок этишди. Конференция якунлари бўйича иштирокчилар Ўзбекистон Республикасида антикоррупцион ислоҳотларни янада ривожлантиришдаги ҳамкорлик йўналишларини белгилаб олишди. Тадбирда БМТнинг Ўзбекистондаги доимий координатори Хелена Фрейзер, БМТнинг Гиёвҳанд моддалар ва жиноятчилик бошқармасининг Марказий Осиёдаги ҳудудий вакили Ашита Миттал, БМТТД Коррупцияга қарши курашиш глобал дастури маслаҳатчиси Анга Тимилсина, ЕХҲТ Ўзбекистондаги лойиҳалар координатори в.б. Ханс-Ульрих Им ва бошқа халқаро экспертлар иштирок этишди.

Охирги кунда “Ўзбекистон Республикасининг антикоррупцион чоралари: чақириқлар, натижалар, устунликлар” мавзусида медиа-форум ўтказилди ҳамда мазкур медиа-форум давлат ташкилотлари, ОАВ, халқаро ташкилотлар ва элчихоналарнинг 150 дан ортиқ вакилларини жамлади. Маросимда Ўзбекистон Республикасининг коррупцияга қарши курашиш соҳасидаги қонунчилигини такомиллаштириш, коррупцияни бартараф этишда фуқаролик жамияти ҳамда хусусий секторнинг роли, давлат секторида антикоррупцион чораларнинг самарадорлигини ошириш масалалари муҳокама қилинди.

Марафон олий таълим муассасалари ҳамда касб-ҳунар коллежлари студентлари ўртасида коррупцияга қарши курашиш бўйича “Энг яхши плакат”, “Энг яхши расм”, “Энг яхши иншо” номинациялари бўйича энг яхши ижодий ишлари миллий танлови ғолибларини тақдирлаш билан якунланди.