Ўзбекистон Халқаро исломшунослик академияси талабаларининг ўқув-танишув ташрифи

Ўзбекистон Республикаси Ҳуқуқни муҳофаза қилиш академиясида Ўзбекистон Халқаро исломшунослик академиясининг “Юриспруденция” йўналишида таҳсил олаётган талабалари учун ўқув-танишув ташрифи ташкил этилди.

Ташрифдан кўзланган асосий мақсад – ёшларни ҳуқуқни муҳофаза қилувчи органлар учун кадрлар тайёрлаш фаолияти билан яқиндан таништириш, уларда ҳуқуқий онг ва маданиятни юксалтириш, шунингдек, юридик мутахассисликни танлаган талабаларда бўлажак касбига бўлган қизиқишни оширишдан иборат.

Учрашув давомида меҳмонлар Академиянинг тарихи, вазифалари, таълим жараёни, илмий-тадқиқот фаолияти ҳамда ихтисослашган таркибий бўлинмалари фаолияти билан танишдилар. Академия раҳбарияти талабаларга ҳуқуқни муҳофаза қилиш тизимида амалга оширилаётган ислоҳотлар, замонавий ёндашувлар ва соҳага оид долзарб масалалар ҳақида маълумот берди.

Тадбир якунида талабалар ўзларини қизиқтирган саволлар билан мурожаат қилиб, малакали мутахассислардан атрофлича жавоблар олдилар. Шунингдек, Академиянинг ўқув-амалиёт бинолари бўйлаб экскурсия ташкил этилди.

Бундай ташрифлар ёшларда ҳуқуқий билимларни чуқурлаштириш, уларни миллий қонунчиликка ҳурмат руҳида тарбиялашда муҳим аҳамият касб этади.