Давлат хавфсизлик хизмати терговчилари учун навбатдаги малака ошириш курси бошланди

Ҳуқуқни муҳофаза қилиш Академиясида Давлат хавфсизлик хизмати терговчилари учун тинчлик ва хавфсизликка қарши жиноятлар бўйича тергов фаолиятини ташкил этиш ҳамда бу жараёнда замонавий криминалистик-техник воситалардан фойдаланиш масалаларига бағишланган навбатдаги малака ошириш курси бошланди.

Курс дастури тинчлик ва хавфсизликка қарши қаратилган жиноятлар юзасидан ўтказиладиган тергов ҳаракатлари, тергов жараёнида рақамли қурилмаларда сақланаётган маълумотларни тўғри расмийлаштириб олиш, интернет ижтимоий тармоқларида ўчирилган маълумотларни қайта тиклаш, шахсни идентификация қилишда қўлланиладиган замонавий криминалистик техник воситалардан фойдаланиш ва шу каби қатор долзарб масалаларни қамраб олган.

Малака ошириш курси давомида назарий машғулотлар билан бир қаторда, олинган билимларни мустаҳкамлаш ҳамда зарур кўникмаларни шакллантириш мақсадида амалий ўқув машғулотлари, шу жумладан, Х.Сулаймонова номидаги Республика суд экспертиза маркази, Эксперт-криминалистика бош марказлари, Ўзбекистон Республикаси Дин ишлари бўйича қўмитаси, ва бошқа ташкилотларда сайёр ўқув машғулотлари ўтказиш режалаштирилган.