Ўзбекистон Республикаси Ҳуқуқни муҳофаза қилиш академияси томонидан “Юридик фан ва ҳуқуқни қўллаш амалиётининг долзарб масалалари” мавзусидаги халқаро илмий-амалий конференция материалларининг икки жилдли тўплами нашр этилди.

Мазкур тўпламда таълим, фан ва амалиётнинг интеграцияси, илмий тадқиқотларни ўтказишдаги коррупция ва бюрократик тўсиқларни бартараф этиш, юридик соҳада илмий ишлар тайёрлашда сунъий интеллектдан фойдаланиш, юридик фан ва ҳуқуқни қўллаш амалиётида ягона ёндашувни жорий этиш, инсон ҳуқуқлари соҳасида таълимни амалга оширишнинг халқаро-ҳуқуқий асослари, ахборот-коммуникация технологияларидан фойдаланиб содир этилган жиноятларни тергов қилиш масалалари кенг ёритилган.

Шунингдек, тўпламда юридик фаннинг турли йўналишларига оид бошқа долзарб муаммолар ҳамда улар бўйича тўпланган илмий ва амалий тажрибалар таҳлил этилган.

Тўпламда Россия Федерацияси, Беларусь Республикаси ва Қозоғистон Республикасининг етакчи юридик таълим муассасалари профессор-ўқитувчилари, Ўзбекистон Республикаси прокуратура органлари ходимлари, юртимизнинг таниқли ҳуқуқшунос олимлари, докторантлар, мустақил изланувчилар ва ёш тадқиқотчиларнинг илмий мақолалари ҳамда тезислари жой олган.