Ҳуқуқни муҳофаза қилиш академиясида “TED Talks” мотивацион нутқлар танлови бўлиб ўтди

Ҳуқуқни муҳофаза қилиш академиясида “TED Talks” мотивацион нутқлар танлови бўлиб ўтди. Танловда бакалавриатнинг 2–3-босқич талабалари иштирок этди. Тадбирнинг мақсади – талабаларда омма олдида сўзлаш, лидерлик қобилиятларини ва бошқаларни илҳомлантириш маҳоратини ривожлантиришдан иборат бўлди.

Танлов иштирокчилари ўз нутқларида шахсий ривожланиш, мақсадга интилиш, Ватанга хизмат қилиш ва ҳуқуқни муҳофаза қилиш тизими ходимига хос маънавий қадриятлар ҳақида сўз юритдилар.

Тадбирда 1-босқич талабалари томошабин сифатида иштирок этишди. Улар учун мазкур танлов нафақат илҳом манбаи, балки юқори курс талабалари тажрибасидан ўрнак олиш имконияти ҳам бўлди.

Тадбирда Академия раҳбарияти, ҳакамлар ҳайъати аъзолари, шунингдек Талабалар кенгаши раиси ва координаторлар иштирок этдилар. Улар иштирокчиларнинг юксак даражадаги тайёргарлигини, нутқларидаги самимийлик ва таъсирчанликни алоҳида таъкидлаб, бундай ташаббуслар талабаларнинг фаол фуқаролик позицияси ва омма олдида сўзлаш маданиятини шакллантиришда муҳим аҳамиятга эга эканини қайд этдилар.

Тадбир илҳом, ўзаро қўллаб-қувватлаш ва ўз устида ишлаш руҳида ўтди ҳамда Академияда талабаларнинг фаоллиги ва ташаббускорлигини ривожлантиришга қаратилган навбатдаги муҳим қадам бўлди.