Божхона органлари суриштирувчилари малакаси оширилмоқда

Ҳуқуқни муҳофаза қилиш академиясида божхона органлари суриштирувчилари учун “Божхона органларида суриштирувни ташкил этиш ва амалга ошириш масалалари” мавзусида навбатдаги малака ошириш курсининг анъанавий қисми бошланди.

Курс дастури божхона тўғрисидаги қонунчиликни бузиш жиноятларини тергов қилишнинг ўзига хос хусусиятлари, тафтиш тайинлаш ва уни ўтказиш, тезкор-қидирув фаолияти натижаларидан жиноят процессида фойдаланишни ташкил этиш, контрабанда жиноятларини тергов қилиш методикаси, Интернетнинг яширин (Darknet) ва чуқур тармоқларда содир этиладиган асосий жиноятлар, божхона органлари томонидан терговга қадар текширувни амалга оширишдаги муаммолар ва бошқа масалаларни ўз ичига олган.

Малака ошириш курси Ўзбекистон Республикасининг жиноят-процессуал қонунчилигига киритилган охирги ўзгартириш ва қўшимчаларнинг мазмун-моҳияти, ташқи иқтисодий фаолият соҳасидаги жиноятлар, очиқ маълумотлар базалари ва ресурслардан далилларни тўплаш (OSINT) имкониятларидан амалий фойдаланиш, жиноятчиликка қарши курашиш ва ҳуқуқбузарликлар профилактикасининг ижтимоий-иқтисодий ҳамда ҳуқуқий асосларига оид тингловчиларнинг билим ва кўникмаларини оширишга йўналтирилган.