Ёшлар – коррупцияга қарши курашиш ҳаракатининг етакчилари

Ўзбекистон Республикаси Ҳуқуқни муҳофаза қилиш академиясининг Коррупцияга қарши курашиш илмий-таълим маркази томонидан Ўзбекистон Республикаси Миллий гвардиясининг Тошкент ҳудудий ўқув марказида "Ёшлар – коррупцияга қарши курашиш ҳаракатининг етакчилари" мавзусида ўқув тренинги ташкил этилди.

Тадбирнинг асосий мақсади шахсий таркиб ва курсантларнинг коррупцияга қарши курашиш соҳасидаги билимларини ошириш, ҳалоллик маданиятини шакллантириш ҳамда ёшларда фаол фуқаролик позициясини мустаҳкамлашдан иборат бўлди.

Тренинг давомида иштирокчилар ёш авлоднинг ҳалоллик ва шаффофлик тамойилларини илгари суришдаги ўрни, коррупциявий ҳолатларнинг олдини олиш ва жамиятда унга нисбатан муросасизликни кучайтириш масалаларини муҳокама қилдилар.

Интерактив усулда ташкил этилган машғулотлар, савол-жавоб ва амалий мисоллар ёрдамида тингловчилар ўз билим ва кўникмаларини мустаҳкамладилар.

Мазкур ўқув тренинги ёшлар ўртасида ҳуқуқий маданиятни юксалтириш, ҳалоллик ва адолат қадриятларини мустаҳкамлаш ҳамда коррупцияга қарши курашишда фаол фуқаролик позициясини шакллантиришга хизмат қилади.