Академияда адабий-шеърий учрашув: авлодлар мулоқоти ва ёш китобхонлар учун илҳом манбаи

Ҳуқуқни муҳофаза қилиш академиясида талабаларнинг китобхонлик маданиятини ривожлантириш, ижодий фикрлашини рағбатлантириш ва миллий адабиётга бўлган қизиқишини кучайтириш мақсадида адабий-шеърий учрашув ташкил этилди.

Тадбир меҳмонлари сифатида Ўзбекистон Ёзувчилар уюшмаси раиси ўринбосари, шоир Ғайрат Мажид ҳамда шоирa Маъмура Захидова иштирок этдилар.

Учрашувни Академия бошлиғининг ўринбосари Ш.Мустафаев очиб бериб, бу каби маънавий-маърифий ташаббуслар ёш авлоднинг дунёқарашини бойитишда муҳим аҳамиятга эга эканини таъкидлади.

Шоир Ғайрат Мажид учрашув давомида ўз ижодий сафари, асарларининг ғоявий йўналишлари ва илҳом манбалари ҳақида қизиқарли фикрлар билан ўртоқлашди. Шоира Маъмура Захидова эса ўз шеърларини ўқиб, ёшларни она тилини ардоқлашга, миллий қадриятлар ва маънавий меросга ҳурмат билан муносабатда бўлишга чорлади.

Учрашув жонли мулоқот руҳида ўтди: талабалар фаол саволлар йўллаб, адабиёт, ижод ва маънавият мавзулари юзасидан қизғин фикр алмашдилар. Энг мазмунли саволлар муаллифлари Ўзбекистон Ёзувчилар уюшмаси томонидан бадиий китоблар билан тақдирланди.