Академик декада ва талабалар фестивалига тантанали старт берилди

Ҳуқуқни муҳофаза қилиш академияси ташкил этилганлигига уч йил тўлгани муносабати билан академик декадага тантанали равишда старт берилди. Декада дастури доирасида “Илм билан юксал, талаба!” шиори остида ўрин олган талабалар фестивали ўз ишини 1-курс талабаларининг “Ватанга ваъда” тантанали қасамёд маросими билан бошлади. 

Маросимда Бош прокуратура ва ҳамкор ташкилотлар масъуллари, Академия раҳбарияти, талабалар ҳамда уларнинг ота-оналари иштирок этдилар. Тадбир давомида юқори балл билан Академияга қабул қилинган, халқаро олимпиада ва танловларда муносиб ўрин олган, шунингдек “TED TALKS” мотивацион нутқ танловида ғолиб бўлган талабалар эсдалик совғалар билан тақдирланди.

Таъкидланишича, Академияда илмий салоҳиятни ошириш, талабаларнинг интеллектуал ва ижодий қобилиятларини ривожлантириш бўйича тизимли ишлар амалга оширилмоқда. Қасамёд маросими ана шу йўналишдаги муҳим тарбиявий тадбирлардан бири бўлиб, ёшларни ватанпарварлик, фидойилик ва қонун устуворлигига садоқат руҳида тарбиялашга қаратилган.

Тадбир ҳарбий оркестр ижросидаги мусиқий дастур билан янада файзли ва байрамона руҳда давом этди.

Ҳуқуқни муҳофаза қилиш академияси ташкил этилганлигига уч йил тўлгани муносабати билан ташкил этилган академик декада дастурида: “Замонавий чақириқлар шароитида қонун устуворлигини таъминлаш: муаммо ва ечимлар” мавзусидаги халқаро илмий-амалий конференция; Европа Иттифоқининг EU-ACT лойиҳаси билан ҳамкорликда ташкил этилган очиқ манбалардан фойдаланиб терроризмга қарши курашиш бўйича тренинг; Тожикистон ва Озарбайжон прокуратура ва ички ишлар органлари ходимлари учун “Кибержиноятларга қарши курашиш ва рақамли криминалистика асослари” амалий ўқув курси; коррупцияга қарши курашишда гендер жиҳатларига бағишланган ЕХҲТ семинари; шунингдек дроп-схемалардан фойдаланилган ҳолда фирибгарлик ва пул ювишни аниқлаш ва тергов қилиш бўйича UNODC билан амалий семинар каби тадбирлар ўрин олган.

Профессионал блокнинг якуний тадбири сифатида БМТнинг Коррупцияга қарши конвенцияси иштирокчи-давлатлари конференцияси форматидаги БМТ модели ўтказилади. Унда Ўзбекистон ва Марказий Осиё давлатлари олий таълим муассасалари юридик йўналиш талаба-ёшлари иштирок этадилар.

Профессионал дастурлар қаторида ёшлар ва кенг жамоатчиликка мўлжалланган қатор маърифий тадбирлар ҳам ташкил этилади. Улар қаторида бугунги “Ватанга ваъда” тадбири, Очиқ эшиклар куни, “Рақамли криминалистиканинг имкониятлари” кўргазмаси, “Заковат” интеллектуал ўйини, “Хорижий тиллар билимдони” танлови, “Жиноий таъқиб остидаги шахслар ҳуқуқларининг муҳофазаси” мавзусидаги дебатлар, шунингдек Халқаро талабалар конференцияси ўрин олган.

Академик декада Академиянинг илмий-таълим салоҳиятини мустаҳкамлаш, кадрлар тайёрлашда замонавий ёндашувларни жорий этиш, халқаро ҳамкорликни кенгайтириш ва ёшлар ҳуқуқий маданиятини оширишга хизмат қилади. Шу билан бирга, Академия фаолиятининг очиқлиги ва шаффофлигини таъминлаш, жамоатчилик олдида ҳисобдорлигини ошириш ҳамда амалга оширилган ишлар натижаларини сарҳисоб қилишни ҳам назарда тутади.

Юбилей ҳафталиги Академиянинг жадал ривожланишини ва замонавий чақириқларга муносиб жавоб бера оладиган юқори малакали мутахассисларни тайёрлашга интилишини ёрқин намоён этади.

ОАВ вакилларини тадбирларда иштирок этишга таклиф қиламиз. Рўйхатдан ўтиш учун шу ҳавола орқали мурожаат қилишингиз мумкин.