Академияда Давлат байроғининг 34 йиллиги муносабати билан тадбир ўтказилди

Ўзбекистон Республикаси Ҳуқуқни муҳофаза қилиш академиясида Давлат байроғи қабул қилинганлигининг
34 йиллигига бағишланган бир қатор маънавий-маърифий тадбирлар ташкил этилди.

Шулардан бири сифатида бакалавриат талабалари иштирокида “Бир ватан, бир эл, бир байроқ!” мавзусида маънавий-маърифий учрашув бўлиб ўтди. Тадбирга Мирзо Улуғбек номидаги Ўзбекистон Миллий университети доценти, PhD О.Алимардонов маърузачи сифатида таклиф этилди.

Учрашувда Давлат байроғининг мамлакат мустақиллиги рамзи сифатида қабул қилиниши, унинг тарихий аҳамияти, ранг ва тимсоллар орқали халқимизнинг шонли ўтмиши, эзгу орзулари ва юксак келажакка интилиши ифодалангани ҳақида батафсил маълумот берилди. Шунингдек, ёш авлод онгида ватанпарварлик, фидойиллик, тинчлик ва барқарорлик ғояларини мустаҳкамлашнинг долзарблиги алоҳида таъкидланди.

Маърузачи томонидан давлат рамзларининг тарихий ва маънавий мазмунини чуқур англаш, уларга ҳурмат билан муносабатда бўлиш ва ҳар бир рамз ортидаги улуғ ғояларни тўғри талқин қилишнинг аҳамияти ҳақида фикр-мулоҳазалар билдирилди.

Тадбир якунида талабалар Давлат байроғининг тарихи ва унинг мазмунига доир ўзларини қизиқтирган саволларга атрофлича жавоб олдилар.