Академик декада доирасида “Рақамли криминалистика асослари” тренинги ўтказилмоқда  

Ҳуқуқни муҳофаза қилиш академияси ташкил этилганлигининг уч йиллигига бағишланган академик декада доирасида тадбирлар давом этмоқда.

Декада доирасида қонун устуворлигини мустаҳкамлаш, ҳуқуқни муҳофаза қилиш органлари ходимларининг касбий компетенцияларини ривожлантириш, замонавий таҳдидларга қарши курашиш ва халқаро ҳамкорликни кенгайтиришга қаратилган йирик халқаро, таълим ва илмий-амалий тадбирлар туркуми ўтказилиши режалаштирилган.

Академиянинг Рақамли криминалистика илмий-тадқиқот институти киберлабораторияси негизида БМТнинг Гиёҳвандлик ва жиноятчилик бўйича бошқармаси Минтақавий ваколатхонаси билан ҳамкорликда “Рақамли криминалистика асослари” мавзусида Ўзбекистон Республикаси Ички ишлар вазирлиги эксперт-криминалистика бўлинмалари ходимлари учун рақамли криминалистика бўйича ўқув курси ташкил этилди.

Курснинг очилиш маросимида АҚШ Наркотиклар айланмасига қарши кураш ва қонун устуворлигини таъминлаш бўйича халқаро ҳамкорлик бошқармаси (INL), БМТ Гиёҳвандлик ва жиноятчиликка қарши курашиш бошқармаси (UNODC)нинг минтақавий ваколатхонаси, ИИВ Бош эксперт-криминалистика маркази вакиллари ҳамда Академия раҳбарияти иштирок этди.

Ўқув курси кибержиноятларни тергов қилишда рақамли криминалистика тамойиллари ва амалиётини фундаментал ҳамда амалий тушунишни ривожлантиришга қаратилган.

Мазкур курс доирасида рақамли криминалистика: маълумотларни визуаллаштириш ва хешлаш, мобил қурилмаларни тадқиқ қилиш, тармоқ трафигини таҳлил қилиш, серверлар, виртуаллаштириш тизимлари ва маълумотлар базалари билан ишлаш, тергов учун аҳамиятли маълумотларни очиқ манбалар орқали аниқлаш ва тўплаш (OSINT) каби мавзуларда назарий ва амалий дарс машғулотлари ўтказилиши белгиланган.

Ушбу ўқув курси натижасида иштирокчилар рақамли криминалистика асосларини ўзлаштириш орқали кибержиноятларга қарши самарали тергов олиб бориш учун зарур бўлган назарий ва амалий кўникмаларга эга бўладилар. Бу эса, уларнинг профессионал малакаси ва кибержиноятларга қарши курашишдаги самарадорлигини оширишга кўмаклашади.