Академик декада: талабалар рақамли криминалистика олами билан яқиндан танишмоқда

Ҳуқуқни муҳофаза қилиш академиясида Академия ташкил этилганининг уч йиллигига бағишланган академик декада тадбирлари давом этмоқда.

Декада доирасида қатор йирик халқаро, таълим ва илмий-амалий тадбирлар ўтказилиши режалаштирилган бўлиб, улар қонун устуворлигини мустаҳкамлаш, ҳуқуқни муҳофаза қилиш органлари ходимларининг касбий компетенциясини ривожлантириш, замонавий чақириқларга қарши курашиш ва халқаро ҳамкорликни кенгайтиришга қаратилгандир.

Декаданинг навбатдаги тадбири сифатида Академия талабалари учун Рақамли криминалистика илмий-тадқиқот институти мутахассислари томонидан “Рақамли криминалистика имкониятлари” мавзусидаги кўргазма ташкил этилди.

Тадбир рақамли далилларни қидириш, тўплаш, сақлаш ва таҳлил қилиш соҳасидаги замонавий усуллар ва воситаларни намойиш этиш мақсадида ўтказилди.

Кўргазма давомида талабаларга жиноятлар, кибержиноятлар ва интернет-хавфсизликни таъминлаш жараёнида рақамли далилларни аниқлаш, топиш ва қўллашда қўлланиладиган замонавий усуллар, юқори технологик ускуналар, қурилмалар ва дастурий таъминот ҳақида атрофлича маълумот берилди.

Ушбу тадбир орқали талабалар рақамли далилларни тўплаш, таҳлил қилиш ва сақлаш, шунингдек, кибержиноятчилик ва интернет-хавфсизлик соҳасида зарур билим ва кўникмаларга эга бўлдилар.