“БМТнинг Коррупцияга қарши конвенциясини амалга ошириш механизми: иккинчи босқич обзори” тадбири АНОНСИ

Жорий йил 2 декакбрида Ўзбекистон Республикаси Ҳуқуқни муҳофаза қилиш академиясида БМТнинг Коррупцияга қарши конвенцияси иштирокчи-давлатлари конференцияси модели доирасида “БМТнинг Коррупцияга қарши конвенциясини амалга ошириш механизми: иккинчи босқич обзори. Конвенциянинг V-боби, 55-моддаси” мавзусидаги тадбир ўтказилади.

Тадбирнинг асосий мақсади – Конвенцияда назарда тутилган жиноий активларни излаш, вақтинча чеклаш, мусодара қилиш ва қайтариш механизмларини чуқур ўрганиш, шунингдек 55-модда доирасидаги халқаро ўзаро ҳуқуқий ёрдам амалиётини таҳлил қилишдан иборат.

Ушбу тадбирда Марказий Осиёнинг 10 дан ортиқ олий юридик таълим муассасаларидан 70 дан зиёд талабалар иштирок этади. Машғулот доирасида иштирокчилар Конвенциянинг амалий ижросига оид илғор тажрибалар билан танишиб, давлатлар кесимидаги амалиётни ўрганадилар, тақдимотлар тайёрлайдилар ва муҳокамалар ҳамда савол-жавоб сессияларида фаол иштирок этадилар.

Иштирокчилар Австралия, Германия, Ирландия, Нигерия, Шимолий Македония, Португалия, Словения, Жанубий Африка Республикаси, Швейцария, Буюк Британия ва Шимолий Ирландия Қироллиги ҳамда Америка Қўшма Штатларининг Конвенциянинг V-боби, 55-моддаси бўйича тажрибасини таҳлил қилишлари белгиланган.

Тадбир доирасида талабалар мазкур давлатларнинг активларни излаш, вақтинча чеклаш, мусодара қилиш ва қайтаришга оид қонунчилиги, институционал механизмлари ва халқаро ҳамкорлик амалиётини ўрганадилар. Шу билан бирга, иштирокчилар давлат позициясини моделлаштириш, халқаро мезонлар асосида баҳс олиб бориш, асосли қарорлар қабул қилиш ва дипломатик ёндошувларни қўллаш кўникмаларини ривожлантирадилар.

Ушбу тадбир ёш ҳуқуқшуносларнинг халқаро ҳуқуқ, активларни қайтариш ва коррупцияга қарши кураш соҳаларидаги билим ва кўникмаларини мустаҳкамлашга, БМТнинг Коррупцияга қарши конвенциясида белгиланган халқаро стандартларни чуқур англашга, шунингдек давлатлар ўртасидаги ўзаро ҳамкорлик механизмларини тушунишга хизмат қилади.

Конвенцияга тайёргарликнинг биринчи машғулоти Академиянинг Коррупцияга қарши курашиш илмий-таълим маркази ҳамда БМТнинг Гиёҳвандлик ва жиноятчилик бўйича бошқармаси минтақавий ваколатхонаси Аксилкоррупция бўйича миллий лойиҳа раҳбари Азат Ирманов томонидан ўтказилди.