“BMTning Korrupsiyaga qarshi konvensiyasini amalga oshirish mexanizmi: ikkinchi bosqich obzori” tadbiri ANONSI

Joriy yil 2 dekakbrida O‘zbekiston Respublikasi Huquqni muhofaza qilish akademiyasida BMTning Korrupsiyaga qarshi konvensiyasi ishtirokchi-davlatlari konferensiyasi modeli doirasida “BMTning Korrupsiyaga qarshi konvensiyasini amalga oshirish mexanizmi: ikkinchi bosqich obzori. Konvensiyaning V-bobi, 55-moddasi” mavzusidagi tadbir o‘tkaziladi.

Tadbirning asosiy maqsadi – Konvensiyada nazarda tutilgan jinoiy aktivlarni izlash, vaqtincha cheklash, musodara qilish va qaytarish mexanizmlarini chuqur o‘rganish, shuningdek 55-modda doirasidagi xalqaro o‘zaro huquqiy yordam amaliyotini tahlil qilishdan iborat.

Ushbu tadbirda Markaziy Osiyoning 10 dan ortiq oliy yuridik ta’lim muassasalaridan 70 dan ziyod talabalar ishtirok etadi. Mashg‘ulot doirasida ishtirokchilar Konvensiyaning amaliy ijrosiga oid ilg‘or tajribalar bilan tanishib, davlatlar kesimidagi amaliyotni o‘rganadilar, taqdimotlar tayyorlaydilar va muhokamalar hamda savol-javob sessiyalarida faol ishtirok etadilar.

Ishtirokchilar Avstraliya, Germaniya, Irlandiya, Nigeriya, Shimoliy Makedoniya, Portugaliya, Sloveniya, Janubiy Afrika Respublikasi, Shveysariya, Buyuk Britaniya va Shimoliy Irlandiya Qirolligi hamda Amerika Qo‘shma Shtatlarining Konvensiyaning V-bobi, 55-moddasi bo‘yicha tajribasini tahlil qilishlari belgilangan.

Tadbir doirasida talabalar mazkur davlatlarning aktivlarni izlash, vaqtincha cheklash, musodara qilish va qaytarishga oid qonunchiligi, institutsional mexanizmlari va xalqaro hamkorlik amaliyotini o‘rganadilar. Shu bilan birga, ishtirokchilar davlat pozitsiyasini modellashtirish, xalqaro mezonlar asosida bahs olib borish, asosli qarorlar qabul qilish va diplomatik yondoshuvlarni qo‘llash ko‘nikmalarini rivojlantiradilar.

Ushbu tadbir yosh huquqshunoslarning xalqaro huquq, aktivlarni qaytarish va korrupsiyaga qarshi kurash sohalaridagi bilim va ko‘nikmalarini mustahkamlashga, BMTning Korrupsiyaga qarshi konvensiyasida belgilangan xalqaro standartlarni chuqur anglashga, shuningdek davlatlar o‘rtasidagi o‘zaro hamkorlik mexanizmlarini tushunishga xizmat qiladi.

Konvensiyaga tayyorgarlikning birinchi mashg‘uloti Akademiyaning Korrupsiyaga qarshi kurashish ilmiy-ta’lim markazi hamda BMTning Giyohvandlik va jinoyatchilik bo‘yicha boshqarmasi mintaqaviy vakolatxonasi Aksilkorrupsiya bo‘yicha milliy loyiha rahbari Azat Irmanov tomonidan o‘tkazildi.