Коррупцияга қарши курашишда гендер жиҳатларини жорий этишга бағишланган семинар-тренинг ўтказилди

Ҳуқуқни муҳофаза қилиш академияси томонидан жорий йилнинг 17 ноябрь – 2 декабрь кунлари қатор халқаро ташкилотлар кўмагида Академия ташкил этилганининг уч йиллигига бағишланган академик декада бўлиб ўтмоқда. Декада доирасида қонун устуворлигини мустаҳкамлаш, ҳуқуқни муҳофаза қилувчи органлар ходимларининг касбий компетенцияларини ривожлантириш, замонавий таҳдидларга қарши курашиш ва халқаро ҳамкорликни кенгайтиришга қаратилган халқаро, илмий-амалий ва ўқув тадбирлари ўтказилмоқда.

Шу йўналишда жорий йилнинг 26–27 ноябрь кунлари Академияда Европа Хавфсизлик ва Ҳамкорлик Ташкилоти (ЕХҲТ)нинг Ўзбекистондаги лойиҳалар координатори билан ҳамкорликда “Коррупцияга қарши курашишда гендер жиҳатларининг концептуал-ҳуқуқий асослари” мавзусида чуқурлаштирилган семинар-тренинг ташкил этилди.

Семинар-тренинг коррупцияга қарши курашиш ва хотин-қизларни ҳимоя қилиш соҳаларида фаолият юритаётган давлат органлари, академик ва таълим муассасалари, нодавлат нотижорат ташкилотлари ва бошқа манфаатдор тузилмаларга гендер жиҳатларини инобатга олган ҳолда фаолиятни ташкил этиш, халқаро тажриба ва илғор амалиётларни ўргатиш, шунингдек семинар натижалари асосида масофавий ўқув курсларини ишлаб чиқиш мақсадида ўтказилди.

Тадбирда Олий Мажлис Сенати ва Қонунчилик палатаси, Бош прокуратура, Олий суд, Коррупцияга қарши курашиш агентлиги, Оила ва хотин-қизлар қўмитаси, Адлия, Ички ишлар, Камбағалликни қисқартириш ва бандлик вазирликлари, Давлат сиёсати ва бошқаруви академияси, Қонунчилик ва ҳуқуқий сиёсат институти, Одил судлов академияси, Тошкентдаги Вестминстер университети ҳамда қатор олий таълим муассасалари вакиллари иштирок этди.

Семинар-тренинг ЕХҲТ Котибиятининг коррупция ва гендер масалалари бўйича халқаро эксперти доктор Ина Куббе томонидан олиб борилди. Маъруза жараёнида у гендер жиҳатлари инобатга олинган антикоррупция сиёсатининг халқаро тажрибаси, жумладан ишга жойлашишда камситиш ҳолатлари, таълим ва тиббиёт соҳасидаги тенглик муаммолари, ижтимоий ёрдам олишда ҳуқуқларнинг чекланиши каби долзарб масалаларни ёритиб берди.

Икки кунлик семинар-тренинг якунида иштирокчиларга сертификатлар топширилди.

Шунингдек, тадбир барқарорлигини таъминлаш мақсадида унинг натижалари асосида Академия негизида ташкил этилган Коррупцияга қарши курашиш виртуал академияси электрон платформасида барча давлат органлари ва ташкилотлари ходимлари учун гендер ва коррупция масалалари бўйича масофавий ўқув курси ва тегишли ўқув материаллари ишлаб чиқилиши белгиланди.