Korrupsiyaga qarshi kurashishda gender jihatlarini joriy etishga bag‘ishlangan seminar-trening o‘tkazildi

Huquqni muhofaza qilish akademiyasi tomonidan joriy yilning 17 noyabr – 2-dekabr kunlari qator xalqaro tashkilotlar ko‘magida Akademiya tashkil etilganining uch yilligiga bag‘ishlangan akademik dekada bo‘lib o‘tmoqda. Dekada doirasida qonun ustuvorligini mustahkamlash, huquqni muhofaza qiluvchi organlar xodimlarining kasbiy kompetensiyalarini rivojlantirish, zamonaviy tahdidlarga qarshi kurashish va xalqaro hamkorlikni kengaytirishga qaratilgan xalqaro, ilmiy-amaliy va o‘quv tadbirlari o‘tkazilmoqda.

Shu yo‘nalishda joriy yilning 26–27-noyabr kunlari Akademiyada Yevropa Xavfsizlik va Hamkorlik Tashkiloti (YEXHT)ning O‘zbekistondagi loyihalar koordinatori bilan hamkorlikda “Korrupsiyaga qarshi kurashishda gender jihatlarining konseptual-huquqiy asoslari” mavzusida chuqurlashtirilgan seminar-trening tashkil etildi.

Seminar-trening korrupsiyaga qarshi kurashish va xotin-qizlarni himoya qilish sohalarida faoliyat yuritayotgan davlat organlari, akademik va ta’lim muassasalari, nodavlat notijorat tashkilotlari va boshqa manfaatdor tuzilmalarga gender jihatlarini inobatga olgan holda faoliyatni tashkil etish, xalqaro tajriba va ilg‘or amaliyotlarni o‘rgatish, shuningdek seminar natijalari asosida masofaviy o‘quv kurslarini ishlab chiqish maqsadida o‘tkazildi.

Tadbirda Oliy Majlis Senati va Qonunchilik palatasi, Bosh prokuratura, Oliy sud, Korrupsiyaga qarshi kurashish agentligi, Oila va xotin-qizlar qo‘mitasi, Adliya, Ichki ishlar, Kambag‘allikni qisqartirish va bandlik vazirliklari, Davlat siyosati va boshqaruvi akademiyasi, Qonunchilik va huquqiy siyosat instituti, Odil sudlov akademiyasi, Toshkentdagi Vestminster universiteti hamda qator oliy ta’lim muassasalari vakillari ishtirok etdi.

Seminar-trening YEXHT Kotibiyatining korrupsiya va gender masalalari bo‘yicha xalqaro eksperti doktor Ina Kubbe tomonidan olib borildi. Ma’ruza jarayonida u gender jihatlari inobatga olingan antikorrupsiya siyosatining xalqaro tajribasi, jumladan ishga joylashishda kamsitish holatlari, ta’lim va tibbiyot sohasidagi tenglik muammolari, ijtimoiy yordam olishda huquqlarning cheklanishi kabi dolzarb masalalarni yoritib berdi.

Ikki kunlik seminar-trening yakunida ishtirokchilarga sertifikatlar topshirildi.

Shuningdek, tadbir barqarorligini ta’minlash maqsadida uning natijalari asosida Akademiya negizida tashkil etilgan Korrupsiyaga qarshi kurashish virtual akademiyasi elektron platformasida barcha davlat organlari va tashkilotlari xodimlari uchun gender va korrupsiya masalalari bo‘yicha masofaviy o‘quv kursi va tegishli o‘quv materiallari ishlab chiqilishi belgilandi.