Рақамли давр ва кадрлар тайёрлаш: халқаро конференция доирасида ҳуқуқни муҳофаза қилиш соҳасида илм-фан ва таълим ривожини муҳокама қилдилар

Ўзбекистон Республикаси Ҳуқуқни муҳофаза қилиш академияси ташкил этилганининг 3 йиллиги муносабати билан ўтказилаётган халқаро конференция доирасида “Рақамли даврда ҳуқуқни муҳофаза қилиш соҳасида таълим ва фан: муаммолар ва инновацион ечимлар” мавзусидаги параллел сессия бўлиб ўтди.

Сессия ишида 10 дан ортиқ давлатлардан 20 га яқин халқаро экспертлар, нуфузли хорижий ва халқаро ташкилотлар – БМТ, ЕХҲТ, Европа Иттифоқи, Халқаро миграция ташкилоти, ЮНЕСКО, Халқаро прокурорлар ассоциацияси ва бошқа тузилмалар вакиллари, шунингдек, академик ҳамжамият ва ҳуқуқни муҳофаза органлари мутахассислари иштирок этдилар.

Тадбирни Академия бошлиғининг биринчи ўринбосари, юридик фанлар бўйича фалсафа доктори (PhD), профессор Е.В.Коленко очиб берди. У ўз маърузасида Академиянинг рақамли даврда кадрлар тайёрлаш тизимини ривожлантириш борасидаги тажрибаси билан ўртоқлашиб, халқаро ҳамкорликни кенгайтириш, инновацион ёндашувларни жорий этиш ва ҳуқуқни муҳофаза қилиш соҳасидаги илмий-таълим салоҳиятини мустаҳкамлашнинг муҳим аҳамиятини таъкидлади.

Сессиянинг асосий мақсади рақамли даврда ҳуқуқни муҳофаза қилиш соҳасида таълим ва илм-фаннинг долзарб ўрнини чуқур таҳлил қилиш, кадрлар тайёрлаш сифатини оширишга қаратилган инновацион ёндашувларни муҳокама этиш ва замонавий рақамли таҳдидлар ҳамда имкониятларга тўғри ечимлар топишдан иборат бўлди. Шунга мувофиқ, халқаро тажриба алмашиш, назария ва амалиёт уйғунлигини мустаҳкамлаш, электрон таълим платформалари, масофавий ўқитиш ва замонавий рақамли технологияларни таълим жараёнига жорий этиш каби масалалар сессия марказида бўлди.

Тадбирда бир қатор мамлакатларнинг етакчи мутахассислари ўз тажриба ва таклифлари билан ўртоқлашдилар. Хусусан, Қирғизистон Республикаси Юридик академияси раҳбари А.Турганбаев ҳамда Қозоғистон Республикаси Ҳуқуқни муҳофаза қилиш органлари академияси ректори Н.Абдиров прокурор кадрларини тайёрлашда рақамли моделлар ва трансформация жараёнлари ҳақида маълумот бердилар. Анқара Йилдирим Баязит университети профессори, Туркия–Ўзбекистон ҳуқуқий тадқиқотлар маркази директори С.Татар, Қозоғистон ҳуқуқни муҳофаза қилиш органлари академияси профессори А.Тапенова ҳамда Ўзбекистон Инсон ҳуқуқлари миллий маркази вакили М.Тиллабоев сунъий интеллект технологияларини ҳуқуқни муҳофаза органлари ходимларини тайёрлаш тизимига интеграция қилишнинг долзарб жиҳатларини ёритдилар.

Шунингдек, таълим жараёнида этик комплаенс, қадриятларга асосланган ёндашув ва ҳуқуқни муҳофаза қилиш педагогикасини такомиллаштириш масалалари муҳокама этилди. Швециянинг Лунд университети профессори П.Олссон ҳуқуқни муҳофаза қилиш таълим тизимида қадриятлар ва этик мезонларнинг аҳамияти ҳақида фикр билдирди. Халқаро прокурорлар ассоциациясининг бош юридик маслаҳатчиси Ш.Музаффер эса янги таҳдидларга тайёр кадрлар тайёрлаш зарурлигини таъкидлади. Португалиянинг Коимбра университети қошидаги Фалсафа тадқиқотлари институти муҳаққиқи Г.Сегалерба юридик таълим, либерал қадриятлар ва шахсий ривожланиш ўртасидаги боғлиқлик ҳақида ўз мулоҳазаларини билдирди.

Маърузаларда шунингдек коррупцияга қарши таълимнинг аҳамияти, инсон ҳуқуқлари бўйича таълимни ривожлантириш истиқболлари, юридик тадқиқотлардаги замонавий тенденциялар, юридик таълимнинг халқаро стандартлари, малакаларни ўзаро тан олиш, илмий ҳамкорликни кенгайтириш истиқболлари каби масалалар ҳам алоҳида ўрин тутди.

Сессия якунида таълим ва фаннинг ҳуқуқни муҳофаза қилиш соҳасидаги ўрни, инновацион технологияларни амалиётга татбиқ этиш имкониятлари, кадрлар тайёрлашнинг келгусидаги устувор йўналишлари юзасидан фикр алмашилди. Халқаро экспертлар томонидан илгари сурилган таклифлар асосида соҳани такомиллаштиришга доир амалий тавсиялар ишлаб чиқилиши кутилмоқда. Иштирокчилар ўртасида ўрнатилган янгича халқаро алоқалар эса келгусида қўшма илмий-амалий лойиҳаларни амалга ошириш учун замин яратади.

Конференция доирасида Академия кампуси билан танишув ва бир қатор икки томонлама учрашувлар ташкил этилди. Сессия материаллари ва якунлари махсус тўплам шаклида чоп этилиши режалаштирилган.