Коррупцияга қарши курашишда рақамли хатарлар ва инновацион ечимлар масаласига бағишланган параллел сессия ўтказилди

Ҳуқуқни муҳофаза қилиш академиясида “Замонавий чақириқлар шароитида қонун устуворлигини таъминлаш: муаммо ва ечимлар” мавзусидаги халқаро илмий-амалий конференция доирасида “Коррупция 2.0: рақамли хатарлар ва инновацион ечимлар” номли параллел сессия ўтказилди. Мазкур тадбир Академия томонидан Халқаро коррупцияга қарши ойликка бағишланган туркум лойиҳаларнинг муҳим қисмидир ва у учта алоҳида мавзудаги сессиядан иборат бўлди.

Биринчи – “Коррупциянинг олдини олиш: муаммолар ва ечимлар” мавзусидаги сессияда Олий Мажлис палаталари, БМТнинг Гиёҳвандлик ва жиноятчилик бўйича бошқармаси, Австриядаги Халқаро коррупцияга қарши академия (IACA), Малайзия Коррупцияга қарши академияси, Хитой  Гонконг Коррупцияга қарши курашиш мустақил комиссияси (ICAC), АҚШ Адлия вазирлигининг хорижий прокурорликни ривожлантириш ва тайёргарлик дастури, Швециянинг Лунд университети ҳамда Академия вакиллари иштирок этдилар. Мутахассислар фан, технология ва ҳалоллик маданиятини интеграциялаш, парламентнинг коррупцияга қарши сиёсатдаги роли, Малайзия тажрибаси, ҳалолликни таъминлаш бўйича инновациялар, гендер ва коррупция ўртасидаги боғлиқлик, GRACE дастури натижалари ва CABIN тармоғи фаолиятига оид хулосаларни тақдим этди.

Иккинчи – “Коррупциявий жиноятларни криминализация қилиш” мавзусига бағишланган сессияда Бош прокуратура, Ҳисоб палатаси, Коррупцияга қарши курашиш агентлиги, БМТ ГЖБ, Иқтисодий ҳамкорлик ва тараққиёт ташкилоти (OECD)нинг коррупцияга қарши тармоғи, Civipol ваколатхонаси, Қозоғистон ва Озарбайжон Бош прокуратуралари ҳамда Фан ва таълим вазирлиги экспертлари маъруза қилди. Тақдимотларда БМТнинг Коррупцияга қарши конвенциясига мувофиқ порахўрликни жиноятлаштириш, Истанбул ҳаракатлар режаси доирасидаги ислоҳот жараёнлари, спорт соҳасидаги порахўрлик, давлат аудитида сунъий интеллект технологияларини қўллаш, таълим соҳасида коррупция хавфларини бошқариш, комплаенс-назорат тизимининг самарадорлиги ва юридик шахсларнинг коррупция учун жавобгарлигига доир масалалар муҳокама қилинди.

Учинчи – “Коррупция ва коррупцион хавфларни таҳлил қилиш: халқаро стандартлар ва Ўзбекистон тажрибаси” мавзусидаги якуний сессияда Европа Иттифоқи ва GIZ экспертлари, шунингдек Академия ва Бош прокуратура мутахассислари томонидан жиноий одил судлов жараёнида коррупция хавфларини баҳолаш, ижтимоий нормалардан таъсири, қурилишни лойиҳалаштиришда коррупцион хавфларни аниқлаш, шунингдек ISO 37001 халқаро стандартига мувофиқ порахўрликка қарши бошқарув тизимини жорий этиш бўйича Ўзбекистон (хусусан Академия) тажрибаси тақдим этилди.

Тақдимотлар якунида халқаро ва минтақавий ташкилотлар вакиллари Академиянинг илмий тадқиқотлар ва услубий ечимлар ишлаб чиқишдаги фаол иштироки ва ҳиссасини алоҳида қайд этдилар.

Академия раҳбарияти иштирокчиларга миннатдорлик изҳор этиб, коррупцияга қарши кураш соҳасидаги тадқиқотлар ва амалий лойиҳаларни келгусида ҳамкорликда давом эттиришга тайёрлигини билдирди.