Korrupsiyaga qarshi kurashishda raqamli xatarlar va innovatsion yechimlar masalasiga bag‘ishlangan parallel sessiya o‘tkazildi

Huquqni muhofaza qilish akademiyasida “Zamonaviy chaqiriqlar sharoitida qonun ustuvorligini ta’minlash: muammo va yechimlar” mavzusidagi xalqaro ilmiy-amaliy konferensiya doirasida “Korrupsiya 2.0: raqamli xatarlar va innovatsion yechimlar” nomli parallel sessiya o‘tkazildi. Mazkur tadbir Akademiya tomonidan Xalqaro korrupsiyaga qarshi oylikka bag‘ishlangan turkum loyihalarning muhim qismidir va u uchta alohida mavzudagi sessiyadan iborat bo‘ldi.

Birinchi – “Korrupsiyaning oldini olish: muammolar va yechimlar” mavzusidagi sessiyada Oliy Majlis palatalari, BMTning Giyohvandlik va jinoyatchilik bo‘yicha boshqarmasi, Avstriyadagi Xalqaro korrupsiyaga qarshi akademiya (IACA), Malayziya Korrupsiyaga qarshi akademiyasi, Xitoy Gonkong Korrupsiyaga qarshi kurashish mustaqil komissiyasi (ICAC), AQSH Adliya vazirligining xorijiy prokurorlikni rivojlantirish va tayyorgarlik dasturi, Shvetsiyaning Lund universiteti hamda Akademiya vakillari ishtirok etdilar. Mutaxassislar fan, texnologiya va halollik madaniyatini integratsiyalash, parlamentning korrupsiyaga qarshi siyosatdagi roli, Malayziya tajribasi, halollikni ta’minlash bo‘yicha innovatsiyalar, gender va korrupsiya o‘rtasidagi bog‘liqlik, GRACE dasturi natijalari va CABIN tarmog‘i faoliyatiga oid xulosalarni taqdim etdi.

Ikkinchi – “Korrupsiyaviy jinoyatlarni kriminalizatsiya qilish” mavzusiga bag‘ishlangan sessiyada Bosh prokuratura, Hisob palatasi, Korrupsiyaga qarshi kurashish agentligi, BMT GJB, Iqtisodiy hamkorlik va taraqqiyot tashkiloti (OECD)ning korrupsiyaga qarshi tarmog‘i, Civipol vakolatxonasi, Qozog‘iston va Ozarbayjon Bosh prokuraturalari hamda Fan va ta’lim vazirligi ekspertlari ma’ruza qildi. Taqdimotlarda BMTning Korrupsiyaga qarshi konvensiyasiga muvofiq poraxo‘rlikni jinoyatlashtirish, Istanbul harakatlar rejasi doirasidagi islohot jarayonlari, sport sohasidagi poraxo‘rlik, davlat auditida sun’iy intellekt texnologiyalarini qo‘llash, ta’lim sohasida korrupsiya xavflarini boshqarish, komplayens-nazorat tizimining samaradorligi va yuridik shaxslarning korrupsiya uchun javobgarligiga doir masalalar muhokama qilindi.

Uchinchi – “Korrupsiya va korrupsion xavflarni tahlil qilish: xalqaro standartlar va O‘zbekiston tajribasi” mavzusidagi yakuniy sessiyada Yevropa Ittifoqi va GIZ ekspertlari, shuningdek Akademiya va Bosh prokuratura mutaxassislari tomonidan jinoiy odil sudlov jarayonida korrupsiya xavflarini baholash, ijtimoiy normalardan ta’siri, qurilishni loyihalashtirishda korrupsion xavflarni aniqlash, shuningdek ISO 37001 xalqaro standartiga muvofiq poraxo‘rlikka qarshi boshqaruv tizimini joriy etish bo‘yicha O‘zbekiston (xususan Akademiya) tajribasi taqdim etildi.

Taqdimotlar yakunida xalqaro va mintaqaviy tashkilotlar vakillari Akademiyaning ilmiy tadqiqotlar va uslubiy yechimlar ishlab chiqishdagi faol ishtiroki va hissasini alohida qayd etdilar.

Akademiya rahbariyati ishtirokchilarga minnatdorlik izhor etib, korrupsiyaga qarshi kurash sohasidagi tadqiqotlar va amaliy loyihalarni kelgusida hamkorlikda davom ettirishga tayyorligini bildirdi.